Միացեալ Նահանգներու Ծերակոյտի Յատկացումներու յանձնաժողովը հրապարակած է իր 2023-ի ֆինանսական տարուայ յատկացումներու օրինագիծը, որով կը վերահաստատուի Ազատութեան աջակցութեան 907-րդ լրացումը եւ կ՛առաջարկուի 2 միլիոն տոլար Արցախի մէջ ականազերծման աջակցութեան համար, ինչպէս նաեւ մարդասիրական օգնութիւն` տեղահանուած հայերուն օգնելու համար:
Մասնաւորապէս, Յանձնաժողովի զեկոյցին մէջ կը յայտարարուի, որ ՙմինչեւ 2.000.000 տոլար` մարդասիրական ականազերծման եւ չպայթած զինամթերքի մաքրման համար Լեռնային Ղարաբաղի հակամարտութեան ընթացքին մարտական գործողութիւններէն տուժած տարածքներուն մէջ, ենթակայ է նախնական խորհրդակցութեան Յատկացումներու յանձնաժողովներուն հետ՚, ինչպէս նաեւ ՙմարդասիրական օգնութիւն Լեռնային Ղարաբաղի հակամարտութեան պատճառով՚ տեղահանուածներուն համար:
Յունիսին Ներկայացուցիչներու պալատը ընդունեց օրինագիծի իր տարբերակը, որով կոչ կը կատարուէր 60 միլիոն տոլար օգնութիւն տրամադրել Հայաստանին եւ 2 միլիոն տոլար` Արցախի մէջ ականազերծման աշխատանքներուն համար: Ներկայացուցիչներու պալատի օրինագիծը կը ներառր նաեւ Ազատութեան աջակցութեան 907-րդ լրացման վերաբերող հատուած:
Ազատութեան աջակցութեան 907-րդ լրացումը, որ ԱՄՆ Գոնկրէսը ընդունած է 1992 թուականին, կը սահմանափակէ Ատրպէյճանին տրամադրուող օգնութիւնը` նախատեսելով միայն մարդասիրական աջակցութիւն: Այն կ՛ենթադրէ, որ ԱՄՆ-ն Ատրպէյճանի կառավարութեան պէտք չէ աջակցութիւն տրամադրէ, քանի դեռ այդ երկիրը քայլերու չէ ձեռնարկած Հայաստանի եւ Արցախի դէմ շրջափակումներն ու ուժի կիրառման տարբերակները վերացնելու ուղղութեամբ:
