ՙԿրթութեան մինչեւ 2030 թուականը զարգացման պետական ծրագիրը հաստատելու մասին՚ ՀՀ օրէնքի նախագծով կը նախատեսուի Հայաստանի մէջ ստեղծել ակադեմական քաղաք: ՀՀ կրթութեան, գիտութեան, մշակոյթի եւ մարմնակրթութեան նախարարի տեղակալը Արթուր Մարտիրոսեան կառավարութեան նիստին նախագիծը ներկայացնելով նշեց, որ ակադեմական քաղաքը պիտի ապահովէ ուսումնական հաստատութիւններու, գիտական ու արտադրական կազմակերպութիւններու միջեւ ցանցային համագործակցութեան ընդլայնում` ժամանակակից, վիրթուալ, ընկերային ու ֆիզիքական ենթակառուցուածքներու առկայութեամբ:
ՙԿ՛ակնկալուի, որ համալիր միջոցառումներու հետեւանքով Հայաստաի մէջ օտարերկրեայ ուսանողներու ներկայիս թիւը (շուրջ 7600) պիտի կրկնապատկուի՚, ըսաւ Արթուր Մարտիրոսեան:
ՀՀ փոխվարչապետ Համբարձում Մաթեւոսեան ընդգծեց, որ ակադեմական քաղաքը իր բնոյթով, ֆիզիքական ենթակառուցուածքներով, բովանդակութեամբ պէտք է նոր չափորոշիչ սահմանէ ոչ միայն Հայաստանի մասշտաբներով, այլեւ` հասանելի ըլլայ սփիւռքի մեր հայրենակիցներուն, ինչպէս նաեւ օտարերկրեայ ուսանողներուն համար:
Կառավարութեան ներկայացուցիչները կարեւոր համարեցին այն, որ մասնագիտական ու բարձրագոյն կրթութեան համակարգին մէջ բարձր յառաջդիմութիւն ցուցաբերող, սակայն ընկերային գետնի վրայ անապահով ոեւէ ուսանող դուրս պիտի չմնայ կրթական ծրագրէն, պիտի տրամադրուի պետական կրթաթոշակ:
