ՀՀ կառավարութեան որոշմամբ բժշկական հաստատութիւններու կառուցման եւ վերակառուցման համար ՀՀ Առողջապահութեան նախարարութեան յատկացուեցաւ 851 միլիոն դրամ: Կառավարութեան նիստին ՀՀ առողջապահութեան նախարար Անահիտ Աւանեսեան նշեց, որ յատկացուած գումարը պիտի ուղղուի քանի մը բժշկական կեդրոնի վերակառուցման ու կառուցման, ինչպէս նաեւ մէկ բժշկական կեդրոնի շինարարութեան նախագծանախահաշուային փաստաթուղթերու պատրաստման:
ՙԸնդհանուր պիտի հիմնանորոգուին Վարակիչ հիւանդութիւններու ազգային կեդրոնը, Արմավիրի մարզի Վաղարշապատի, Արագածոտնի մարզի Աշտարակի բժշկական կեդրոնները: Արարատի մարզի Արտաշատի բժշկական կեդրոնի դարմանատան մասնաշէնքը, ինչպէս նաեւ` Լոռիի մարզի ՙՏաշիր՚ եւ Կոտայքի մարզի ՙՆաիրի՚ բժշկական կեդրոններու համար պիտի կառուցուին ամբողջովին նոր շէնքեր: Անկէ բացի, պիտի կազմուի Արթիկի բժշկական կեդրոնի նոր մասնաշէնքի կառուցման նախագծանախահաշուային փաստաթուղթերու փաթեթը՚, ըսաւ Անահիտ Աւանեսեան:
Բժշկական կեդրոնները պիտի յագեցուին անհրաժեշտ նոր սարքաւորումներով ու գոյքով: Նախարարին խօսքով` նպատակն է ապահովել հասանելի որակեալ բժշկական օգնութիւն տարածքներու համաչափ զարգացման ծիրին մէջ:
ՙՄինչեւ տարեվերջ պիտի ունենանք եւս վեց բժշկական հաստատութիւններու նախագծանախահաշուարկային փաստաթուղթերու ամբողջական փաթեթը: Անոնց մէկ մասի կառուցման եւ վերակառուցման աշխատանքները նկը ախատեսուի մեկնարկել այս տարի: Շինարարական այս կշռոյթը պահպանելու պարագային կառավարութեան ծրագրով նախատեսուած առնուազն 50 բժշկական կեդրոններու վերակառուցման եւ վերազինման խոստումը պիտի կատարուի:
Յառաջիկային նաեւ ընդհանուր ծախսերու ուղղուածութեան փոփոխութիւն պիտի ունենանք եւ մեր ուշադրութիւնը պիտի կեդրոնացնենք առողջութեան պահպանման առաջնային օղակի շէնքային պայմաններու բարելաւման վրայ՚, յաւելեց նախարարը:
