Տնտեսութեան նախարարի պաշտօնակատար Ամին Սալամ յայտնեց, որ երկրին մէջ բարդացած հացի ճգնաժամին պատճառն է երկրէն ալիւրի գողութիւնը: Ըստ Սալամի, յառաջիկայ օրերուն Լիբանան պիտի հասնի 49 հազար թոն ցորեն, մաղթելով որ նաւերը աւելի արագ հասնին երկիր: Իսկ հացի փուռերու սեփականատէրերու սենտիքայի նախագահը ահազանգեց, թէ հացի կապոցին գինը կրնայ հասնիլ 35-40 հազար լիրայի:
Ուժանիւթային առումով, Քարիւղի ընդհանուր տնօրէնութիւնը յայտարարեց, որ Կեդրոնական դրամատան կողմէ հրապարակուած նորագոյն որոշումին հիման վրայ, պենզինի սակագինին 85 առ հարիւրը պիտի ապահովուի ՙՍայրաֆա՚ հարթակին հիման վրայ, իսկ մնացեալ 15 առ հարիւրը` զուգահեռ շուկայի սակագինով: Նախապէս, Կեդրոնական դրամատունը պենզինի սակագինը կ’ապահովէր բացառապէս ՙՍայրաֆա՚-ի սակագինով: Նշեալ փոփոխութեան հիման վրայ, պենզինի թիթեղին սակագինը երէկ ականատես դարձաւ 14 հազար լիրայի աճի:
Իսկ Լիբանանեան ուժեր կուսակցութեան նախագահ Սամիր Ժաաժաա Լիբանանի պաշտօնակատար կառավարութեան կոչ ուղղեց համաձայնելու Իրանէն անվճար քարիւղ բերելու առնչութեամբ Հըզպալլայի ընդհանուր քարտուղար սեյիտ Հասան Նասրալլայի առաջարկին, որպէսզի այդ վառելանիւթը գործածուի ելեկտրականութիւն արտադրելու համար: ՙԱյս կ’ըսեմ, ոչ թէ որովհետեւ կը հաւատամ, որ ծրագիրը պիտի գործադրուի, այլ որպէսզի լիբանանցիները չդառնան ենթադրութիւններու եւ խօսքերու զոհը, ինչպէս պատահեցաւ իրանեան մազութի պարագային՚, ըսաւ Ժաաժաա:
