ՙՀայաստանը ի սկզբանէ հրաժարած է եւ կը հրաժարի ՙԶանգեզուրի միջանցք՚ի հարց քննարկելէ, նման տրամաբանութիւնը որեւէ կերպ ընդունելի չէ: Այս մասին խորհրդարանին մէջ ասուլիսի ընթացքին վերահաստատեց ՀՀ Ազգային ժողովի արտաքին յարաբերութիւններու մշտական յանձնաժողովի նախագահ Էտուարտ Աղաճանեանը:
ՙՀայաստանի կողմէ բազմիցս նշուած է, որ Զանգեզուրի միջանցքի տրամաբանութիւնը որեւէ կերպ ընդունելի չէ Հայաստանի համար՚, ըսաւ Աղաճանեան:
Ան յիշեցուց, որ, երբ Հայաստանի վարչապետին, Ատրպէյճանի նախագահին եւ Եւրոխորհուրդի նախագահին վերջին հանդիպման հետեւած է Ալիեւի համապատասխան յայտարարութիւնը` այդ շարքին նաեւ ՙԶանգեզուրի միջանցք՚ը յիշատակելով, Եւրոխորհուրդի նախագահին գրասենեակը հերքող յայտարարութեամբ հանդէս եկած է, որ նման բան չէ քննարկուած:
ՙԱյս գործելաոճը նոր չէ: Ատրպէյճանը մշտապէս առանձնացած է նմանատիպ գործելակերպով: Սա առանձնապէս չ՛օգներ կամ չի խրախուսեր կառուցողական քննարկումները: Բայց, ցաւօք, մեր դրացիները կ՛առանձնանան նմանատիպ ոչ-պատշաճ, պայմանաւորուածութիւնները չպահող գործելակերպով: Հայաստանի դիրքորոշումը այս հարցով չէ փոխուած: Հայաստան կը հրաժարի նման հարց քննարկելէ, հրաժարուած է ի սկզբանէ՚, շեշտեց պատգամաւորը:
