Խօսքի ազատութեան պաշտպանութեան կոմիտէի (ԽԱՊԿ) զեկոյցին համաձայն` 2022 թուականի երկրորդ եռամսեակին Հայաստանի մէջ նկատելի նուազած են եղեկութիւններ ստանալու եւ տարածելու իրաւունքի խախտումները: ԽԱՊԿ-ի նախագահ Աշոտ Մելիքեան նշեց, որ եթէ 2022 թուականի առաջին եռամսեակին արձանագրուած էր նման 45 դէպք, ապա ընթացիկ տարուան երկրորդ եռամսեակին եղած է 24:
ՙԿու գայ ժամանակահատուած մը, երբ լրատուամիջոցները աւելի շատ զբաղած են զուտ քաղաքական զարգացումներով: Ինչպէս գիտէք, Ապրիլ-Յունիս ժամանակահատուածին քաղաքական զարգացումները հիմնականին մէջ փողոցին մէջ կը ծաւալէին, արտաքին քաղաքական գործընթացներ կային, ու լրատուամիջոցները անոնց վրայ կեդրոնացած էին: Կը կարծեմ, որ այդ ժամանակահատուածին պետական կառոյցներուն ուղղուած հարցումներուն ծաւալը այդքան շատ չէ եղած, պակսած է՚, ըսաւ Աշոտ Մելիքեան:
Այնուամենայնիւ, Աշոտ Մելիքեան նկատեց, որ պետական մարմիններէն տեղեկութիւն ստանալը կը շարունակէ մնալ բարդ: Բազմաթիւ լրատուամիջոցներ իրենց դժգոհութիւնը կը յայտնեն այդ առնչութեամբ: Ուսումնասիրութիւնները ցոյց կու տան, որ տեղեկութիւն չտրամադրելու հիմնաւորումները խնդրայարոյց են: Շատ յաճախ պետական կառոյցները կը խուսափին համարժէք, պատշաճ արձագանգ տալէ:
ՙԴեռ չեմ ըսեր ՙլղոզուած՚ պատասխաններու մասին: Այս առումով կարեւոր էր, որ խորհրդարանը ընդունեց տեղեկատուութեան ազատութեան մասին օրէնքին մէջ փոփոխութիւնները, ըստ որուն, պատասխանատուները, որոնք անհիմն կը մերժեն ու չեն տրամադրեր հրապարակման ենթակայ տեղեկութիւնը, կ’ենթարկուին աւելի խիստ պատասխանատուութեան: Այսինքն` վարչական տուժի չափը աւելցուած է՚, ըսաւ Աշոտ Մելիքեանը:
Խօսքի ազատութեան պաշտպանութեան կոմիտէի նախագահը նշեց, որ լրատուամիջոցները, մերժում ստանալէ յետոյ, հիմնականին մէջ չեն դիմեր դատարան: Անոնք կը խուսափին դատական քաշքշուքներէ: Այս տարուան երկրորդ եռամսեակին արձանագրուած 24 դէպքէն միայն մէկ լրատուամիջոց դիմած է դատարան:
Ընթացիկ տարուան երկրորդ եռամսեակին, առաջին եռամսեակին համեմատ, գրեթէ նոյն մակարդակի վրայ մնացած լրատուամիջոցներուն եւ անոնց աշխատակիցներուն նկատմամբ ճնշումներու ցուցանիշերը: Առաջին եռամսեակին 12 դէպք արձանագրուած է, երկրորդ եռամսեակին` 11: Փոխարէնը, մտահոգիչ ցուցանիշ արձանագրուած է լրագրողներու նկատմամբ ֆիզիքական բռնութիւն կիրառելու առումով: Եթէ ընթացիկ տարուան առաջին եռամսեակին այդպիսի մէկ դէպք արձանագրուած էր, ապա երկրորդ եռամսեակին` 11 դէպք` 12 տուժածով:
ՙԿ՛արձանագրենք, երբ երկրին մէջ կը լարուի հասարակական, քաղաքական իրավիճակը, ապա կ՛աւելնայ յարձակումներու թիւը լրագրողներուն վրայ: Կը յիշենք, որ նախորդ ամիսները բաւական լարուած էին, ընդդիմութիւնը անհնազանդութեան գործողութիւններ կը կազմակերպէր: Մեր կողմէ արձանագրուած 11 դէպքէն 10-ը այդ գործողութիւններուն ժամանակ արձանագրուած են: Տուժած են ե՛ւ լրագրողները, ե՛ւ նկարողները՚, ըսաւ Աշոտ Մելիքեանը:
Անդրադառնալով լրատուամիջոցներու եւ լրագրողներու դէմ ներկայացուած դատական գործերու վիճակագրութեան` Աշոտ Մելիքեան նշեց, որ ընթացիկ տարուան երկրորդ եռամսեակին վիրաւորանքի եւ զրպարտութեան հիմքով 8 դատական գործ արձանագրուած է, առաջին եռամսեակին` 7:
