Հայաստանի Հանրապետութեան Պետական եկամուտներու կոմիտէի մաքսանենգութեան դէմ պայքարի վարչութիւնը կը շարունակէ անզիջում պայքարը չարձանագրուած դեղերու եւ դեղագործական արտադրանքի` Հայաստանի սահմանով անօրինական տեղափոխման ուղղութեամբ:
Մաքսանենգութեան դէմ պայքարի վարչութեան աշխատակիցները ՙԶուարթնոց՚ օդակայանի ուղեւորային համալիրի մաքսային հսկողութեան գօտիին մէջ յայտնաբերած եւ կանխած են Հայաստանի մէջ չարձանագրուած տարբեր տեսակի դեղամիջոցներու անօրինական ներմուծումը:
ՊԵԿ-ի մաքսանենգութեան դէմ պայքարի վարչութեան Զուարթնոց բաժնի աշխատակիցները մաքսային հսկողութիւն իրականացուցած են Թուրքիայէն Հայաստան ժամանած Հայաստանի երկու քաղաքացիներու նկատմամբ: Իրականացուած հսկողութեան հետեւանքով վերջիններուս պատկանող ուղեբեռներուն մէջ յայտնաբերուած է լատինատառ գրառումներով տարբեր տեսակի չարձանագրուած դեղորայք եւ դեղորայքի դատարկ տուփեր, իսկ վերոնշեալ քաղաքացիներու անձնական զննման հետեւանքով` բաճկոններու ներքին գրպաններէն յայտնաբերուած են մաքսային հսկողութենէն թաքցուած քաղցկեղի դեղեր:
Նշուած դէպքերով ՊԵԿ Մաքսանենգութեան դէմ պայքարի վարչութեան մէջ ՀՀ մաքսային օրէնսգիրքի 201-րդ եւ 203-րդ յօդուածներու իրաւախախտման յատկանիշներով նախապատրաստուած են նիւթեր, որոնք փոխանցուած են ՊԵԿ իրաւաբանական վարչութիւն:
