Սեւանի քաղաքային զբօսայգիին մէջ տեղի ունեցած է ՙՇշնջացող ափսէներ՚ գիտարձանի բացման հանդիսաւոր արարողութիւն, որուն մասնակցած են Սեւանի համայնքապետարանի աշխատակիցներ, գիտութեան ոլորտի ներկայացուցիչներ, հիւրեր: Նախագիծի հիմնական նպատակը գիտութեան հանրայնացումն է, տուեալ պարագային` ձայնի տարածման յատկութիւններու բացայայտումը գիտարձանի միջոցով:
ՙԳիտարձանին գաղափարը ծնաւ 3 տարի առաջ, երբ Միացեալ Նահանգներու Սան Ֆրանսիսքօ քաղաքին մէջ տեսայ ձայնային հայելիներ, որոնք պատրաստուած էին պրոնզէ: Հետագային ուսումնասիրեցի երեւոյթը եւ հասկցայ, որ աշխարհի մէջ նման գիտարձանները շատ քիչ են, այն ալ` միայն զարգացած երկիրներուն մէջ: Որոշեցի, որ այդպիսին պիտի կառուցուի նաեւ Հայաստանի մէջ՚, ներկայացուցած է ՙՇշնջացող ափսէներ՚-ու հեղինակ Գայիանէ Կարապետեանը:
Գաղափարը միս ու արիւն ստացած է Awesome Foundation Yerevan-ի կողմէ ֆինանսական միջոցներ տրամադրելու շնորհիւ:
ՙՀամբերատարութեան, ճիշդ համագործակցութեան, պրպտուն աշխատանքի շնորհիւ գիտարձանի ստեղծումը դարձաւ իրողութիւն եւ գտաւ իր մնայուն տեղը: Ու այդ ճանապարհին Գայիանէին օգնութեան հասան ու աջակցութեան ձեռք մեկնեցին շարք մը կազմակերպութիւններ ու անհատներ, անոր ընտանիքի անդամներն ու ընկերները, որոնք հաւատացին անոր, վստահեցան ու չսխալեցան:
Գայիանէն կը խոստովանի, որ նախագիծին վրայ ծախսուած է աւելի շատ ժամանակ եւ գումար քան նախատեսուած էր, եւ յոյս ունի, որ մարդիկ խնամքով ու հոգատարութեամբ կը վերաբերին գիտարձանին, եւ այն երկար տարիներ կը ծառայէ իր նպատակին: Գիտարձանը բացուած է, ՙՇշնջացող ափսէներ՚ը արդէն բոլորին սեփականութիւնն են, իսկ ցուցանակները այցելուներուն կը յուշեն` ինչպէս օգտուիլ անոնցմէ: Սեւան համայնքը Գայիանէ Կարապետեանի եւ անոր նման երիտասարդներուն շնորհիւ պէտք է դառնայ ինքնաբաւ, ուժեղ, կայացած ու ներկայանալի՚, նշեց համայնքապետարանի աշխատակազմի աշխատակիցը:
