Քուէյթահայ բարերար, գործարար Կիրակոս Գույումճեան հանդէս կու գայ ՙԳնեցէք Հայաստանի մէջ՚ նախաձեռնութեամբ, որուն նպատակն է նպաստել տնտեսութեան զարգացման: Կիրակոս Գույումճեան նշեց, որ նախաձեռնութեան շուրջ աշխատանքները սկսած էին 2019 թուականէն, սակայն համավարակը ծրագրուած աշխատանքները ետ տարաւ: Այժմ քուէյթահայ բարերարը կրկին Հայաստանի մէջ է, նպատակ ունի տարբեր շրջանակներու մէջ աշխուժացնել ՙԳնեցէք Հայաստանի մէջ՚ արշաւը:
ՙԻնչպէս գիտենք, վերջին շրջանին զբօսաշրջութեան աշխուժութիւն կը նկատուի: Շատերը կը նախընտրեն գալ Հայաստան, իրենց հանգիստը այստեղ կազմակերպել: Այս արշաւին էութիւնը այն է, որ մեր հայրենակիցներուն կոչ ընենք, խրախուսենք, որ իրենց կարիքներուն համար նախատեսուած ապրանքները գնեն Հայաստանի մէջ: Ինչ կարիք կայ դուրսէն բերելու ապրանքներ, եթէ այստեղ ամէն ինչ կայ եւ հնարաւոր է հանգիստի ընթացքին գնել: Եթէ այս նախաձեռնութիւնը տարածում ունենայ, ապա շահաւէտ պիտի ըլլայ Հայաստանի համար՚, ըսաւ Կիրակոս Գույումճեան:
Անոր խօսքով, տնտեսապէս շահաւէտ պիտի ըլլայ տեղի գործարարներուն, արտադրողներուն: Եթէ սփիւռքահայ զբօսաշրջիկները սկսին ամէն այցելութեան ժամանակ գնումներու հիմնական մասը ընել Հայաստանի մէջ, այդ կը նշանակէ, որ այստեղ այդ ապրանքներուն պահանջարկը պիտի աւելնայ: Հետեւաբար ե՛ւ վաճառողներուն համար լաւ պիտի ըլլայ, ե՛ւ արտադրողներուն: Բացի անկէ, երկիր եկած արտարժոյթին ծաւալը պիտի աւելնայ ու անկէ պիտի շահի միայն պետութիւնը:
Հայաստան այցելութեան ժամանակ Կիրակոս Գույումճեան հանդիպումներ ունեցած է Սփիւռքի գլխաւոր յանձնակատարի գրասենեակին մէջ, Զբօսաշրջութեան կոմիտէին մէջ, ներկայացուցած է իր նախաձեռնութիւնը, ինչը դրական արձագանգի արժանացած է:
Կիրակոս Գույումճեանը տարբեր առիթներով կը փորձէ աջակցութեան ծրագիրներով գտնուիլ Հայաստանի ու Արցախի կողքին: Ան արաբական լրատուամիջոցներուն մէջ հանդէս կու գայ հայկական հարցերու հետ կապուած յօդուածներով: Կիրակոս Գույումճեանը նկատեց, որ Հայոց ցեղասպանութեան հարցին հետ կապուած արաբական երկիրներու մէջ տեղեկութեան պակաս կայ:
ՙԸնդհանրապէս, արաբական աշխարհին մէջ հայկական հարցերը ներկայացնելու տեսանկիւնէն թերացած ենք: Անհրաժեշտ չափով չենք կրցած մեր հարցը ներկայացնել արաբ ժողովուրդին: Շատերը ամբողջական պատկերացում չունին Հայոց ցեղասպանութեան, հայկական այլ հարցերուն հետ կապուած: Ես ալ որոշեցի յօդուածներով հանդէս գալ` ներկայացնելով հայկական հարցերը, հակադարձելով ժխտողական դիրքորոշումներուն՚, ըսաւ Կիրակոս Գույումճեանը:
Քուէյթահայ գործարարը հիմնած է ՙՆերսէս Շնորհալի՚ կրթական մրցանակը Հալէպի եւ Քուէյթի երկրորդական վարժարաններու սաները խրախուսելու համար: Արդէն 20-է աւելի աշակերտ արժանացած է այս մրցանակին: Կիրակոս Գույումճեանը նկատեց, որ այն նպաստած է մրցակցութեան, յառաջդիմութեան բարձրացման: Նախաձեռնութիւնը պիտի շարունակուիէ նաեւ յառաջիկայ տարիներուն:
