Ուղղակի գաղութատիրութեան աւարտէն ետք, 20-րդ դարու 50-ական եւ 60-ական թուականներէն սկսեալ, նախկին գաղութներու յարաբերութիւնը նախկին գաղութատէրին հետ մնացին առաջնակարգ: Այսինքն Ֆրանսան պահեց իր տնտեսական եւ մշակութային կապերը նախկին գաղութին հետ: Օրինակ Մալիի նման երկիր մը նախ յարաբերութիւն կը մշակէր Ֆրանսայի հետ, Ֆրանսային յարմար գինով կը վաճառէր բնական պաշարը, իր զաւակները կ’ուսանէին Ֆրանսայի համալսարաններուն մէջ: Ներկայիս, Մալիի նման երկիրներ սկսած են մտնել անկախացումի երրորդ փուլ, այսինքն Մալիի ղեկավարութիւնը պիտի որոշէ որու հետ կ’ուզէ յարաբերիլ: Ռուսիոյ Դաշնութեան արտաքին գործերու նախարար Սերկէյ Լաւրովի կոշտ պատասխանը Ֆրանսայի միջամտութեան Մալիի ներքին գործերուն այս ուղղութեամբ կատարուած քայլ է: Լաւրով յայտնեց, որ երկրի ղեկավարութիւնը ազատ է որոշելու թէ որու հետ պիտի համագործակցի եւ ինչ չափով: Գաղութատիրութեան երկրորդ փուլը հասած է կարծես իր աւարտին: Խորհրդային միութիւնը մեծ դեր ունէր նախկին գաղութներու անկախացումի գործին մէջ: Արեւմուտքը բնաւ չներեց Ռուսիոյ այդ գործին համար: Աշխարհ կը փոխուի: Յայտնի է որ կը մտնենք անկախացումի երրորդ եւ կարեւոր փուլ: Այս փուլին, երկիրներ պիտի ունենան անկախ որոշում կայացնելու իրաւունքը: Իրենք պիտի որոշեն իրենց շահերէն մեկնելով, թէ որու հետ պիտի յարաբերին եւ ինչ չափով:
