Գեղարքունիքի մարզի Մարտունիի խոշորացուած համայնքի Աստղաձոր գիւղի կեդրոնական մասին մէջ տեղադրուած է արցախեան վերջին պատերազմին զոհուած չորս զինուորներու` Անդրանիկ Նաւոյեանի, Վահէ Ապրոյեանի, Արման Պօղոսեանի եւ Արթուր Գէորգեանի անուները յաւերժացնող յուշաքարը:
Յուշաքարի բացման արարողութեան մասնակցած են Մարտունիի համայնքապետարանի աշխատակիցներ, Աստղաձորի վարչական ղեկավար Մխիթար Ալեքսանեանը, Աստղաձորի միջնակարգ դպրոցի ուսուցիչներ, զոհուած զինուորներու ծնողները եւ հարազատները: Բացման խօսքով հանդէս եկած է Աստղաձորի միջնակարգ դպրոցի ռազմագիտութեան ուսուցիչ Անդրանիկ Մինասեանը: Ան փառաբանած է իր նախկին սաները, որոնք իրենց կեանքի ու արեան գնով փրկեցին հայրենիքը` մինչեւ վերջ մաքառելով թշնամիներուն դէմ: ՙՄենք գլուխ կը խոնարհենք այս հերոս տղաներու սուրբ յիշատակին առաջ: Անոնք ուսման առաջաւորներ էին, խոհեմ ու խելացի տղաներ, իսկ այսօր արդէն դարձած են անմահ հերոսներ, որոնց անունները արդէն կը յաւերժանան սերունդներու յիշողութեան մէջ՚, նշած է Անդրանիկ Մինասեանը:
Յուշաքարի տեղադրման եւ տարածքի բարեկարգման աշխատանքներու կատարման հովանաւորութիւնը եւ նախաձեռնութիւնը կը պատկանի ծնունդով Աստղաձոր գիւղէն, ռուսաստանաբնակ Արամ եւ Արմէն Աւետիսեաններուն, որոնց տարբեր աշխատանքներով աջակցած են նաեւ գիւղի բնակիչները եւ վարչակազմը` Մխիթար Ալեքսանեանի գլխաւորութեամբ:
