ՀՀ կառավարութիւնը հաստատեց դատական եւ իրաւական բարեփոխումներու 2022-2026 թուականներու ռազմավարութիւնը եւ անկէ բխող գործողութիւններուն ծրագիրը: Կառավարութեան նիստին ՀՀ արդարադատութեան նախարար Կարէն Անդրէասեան նշեց, որ այն նոր չէ, այլ շարունակութիւնն է 2019 թուականին ընդունուած ռազմավարութեան:
ՙՇատ աշխատանքներ, որոնք ներկայացուած են այս ռազմավարութեան մէջ, ժառանգուած են նախորդ ռազմավարութենէն: Անոնք կը կատարելագործուին, աւելի կը բարելաւուին: Որոշ կարեւոր ուղղութիւններ, ցաւօք, չեն իրագործուած համաճարակով ու պատերազմով պայմանաւորուած: Որոշ ուղղութիւններ գրեթէ պատրաստ են, եւ յառաջիկայ ամիսներուն պիտի կարենանք իրագործել՚, ըսաւ Կարէն Անդրէասեանը:
Ներկայացնելով ռազմավարութեան մէջ տեղ գտած դրոյթները` Կարէն Անդրէասեան նշեց, որ առաջինը դատական համակարգի բարեփոխումներն են: Կը նախատեսուի հակափտածութիւն դատարաններու ամբողջ շղթայի գործարկումը: Համակարգը գրեթէ ամբողջութեամբ պատրաստ է: Միւս կարեւոր ուղղութիւնը դատական գործընթացներու թուայնացումն է:
ՙՅաջորդ կարեւոր խնդիրը բարեվարքութեան ստուգումն է, ու սա միայն դատաւորներուն չի վերաբերիր: Այսօր միայն նոր համակարգ մտնող դատաւորներու բարեվարքութիւնը կը ստուգուի, իսկ ռազմավարութեան յառաջիկայ ամիսներուն մենք պիտի նախաձեռնենք, որ ստուգուի բոլոր գործող դատաւորներու բարեվարքութիւնը: Սա փտածութեան դէմ լրջագոյն պայքարի միջոց պիտի դառնայ՚, ըսաւ Կարէն Անդրէասեան` ընդգծելով, որ բարեվարքութեան ստուգում կը նախատեսուի նաեւ դատախազներոնւ, քննիչներուն, քրէակատարողական համակարգի աշխատակիցներուն եւ շարք մը այլ ոլորտներու ներկայացուցիչներուն համար:
Ռազմավարութեան յաջորդ շեշտադրումը Բարձրագոյն դատական խորհուրդին մէջ կարգապահական որոշումներու բողոքարկման հնարաւորութիւնն է, որ օրէնսդրական լուծումներով պիտի ներկայացուի կառավարութեան:
Բարեփոխումներ կը նախատեսուին փաստաբանական ոլորտին մէջ: Նախարարը տեղեկացուց, որ այստեղ բաւականին աշխատանքներ կատարուած են: Մշակուած է օրէնսդրական նախագիծ, աշխատանք տարուած է Փաստաբանական պալատին եւ համայնքին հետ: Կարէն Անդրէասեան ընդգծեց, որ այստեղ կայ համաձայնութիւն:
Ռազմավարութեամբ բարեփոխումներ կը նախատեսուին հարկադիր կատարման համակարգին, սնանկութեան ոլորտին մէջ:
Կարեւոր ռազմաւակարական ուղղութիւն է վէճերու այլընտրանքային լուծման համակարգը: Նախարարը ընդգծեց, որ այն պիտի բեռնաթափէ դատարանները: Ան վստահութիւն յայտնեց, որ արպիթրաժային կեդրոնի ստեղծումը պիտի լուծէ այդ խնդիրը:
