ՀՀ կրթութեան, գիտութեան, մշակոյթի եւ մարմնակրթութեան նախարարի տեղակալ Արթուր Մարտիրոսեան ընդունած է Հայաստանի մէջմ Ալպանիոյ արտակարգ եւ լիազօր դեսպան Լուելա Հայտարական (նստավայրը` Աթէնք):
Արթուր Մարտիրոսեան ողջունած է դեսպանը, շնորհաւորած է պաշտօնին նշանակուելու առիթով եւ մաղթած է արդիւնաւէտ աշխատանք` ի շահ հայ-ալպանական կապերու զարգացման: Արթուր Մարտիրոսեան համոզմունք յայտնած է, որ դեսպանը իր ներդրումը կ’ունենայ Հայաստանի եւ Ալպանիոյ միջեւ յարաբերութիւններու առաւել ամրապնդման եւ խորացման գործին մէջ:
Դեսպան Հայտարական ընդգծած է, որ երկու երկիրներուն միջեւ ընդհանրութիւնները բազմաթիւ են, իսկ կրթական, մշակութային ու քանի մը այլ ուղղութիւններով առկայ է սերտ համագործակցուեան շատ աւելի մեծ ներուժ:
Նախարարին տեղակալը նշած է, որ պատմական, մշակութային ընդհանրութիւններէ զատ` Ալպանիոյ հետ համագործակցութիւնը իւրայատուկ է նաեւ անով, որ Ալպանիան` որպէս անցումային երկիր, ունի էական յաջողութիւններ, որոնք կրնան նկատի առնուիլ Հայաստանի կրթութեան, մշակոյթի, գիտութեան եւ միւս ոլորտներու զարգացման ծիրին մէջ:
Կողմերը քննարկած են երկկողմ եւ բազմակողմ ձեւաչափերով կրթութեան, մշակոյթի եւ երիտասարդութեան ոլորտներուն մէջ համագործակցութեան հեռանկարները` երկուստեք պատրաստակամութիւն յայտնելով քաջալերելու այդ ոլորտներու կառոյցները համագործակցութեան ծաւալման առումով:
Հանդիպման ընթացքին անդրադարձ եղած է նաեւ մշակոյթի ոլորտին մէջ հայ-ալպանական համագործակցութիւնը սերտացնելու անհրաժեշտութեան:
ԿԳՄՄ նախարարին տեղակալը դեսպանին ուշադրութիւնը հրաւիրած է 44-օրեայ պատերազմին հետեւանքով Ատրպէյճանի վերահսկողութեան ներքոյ անցած տարածքներուն մէջ հայկական մշակութային ժառանգութեան պահպանութեան խնդիրին` նշելով, որ հայկական կողմը այս առումով կ՛ակնկալէ միջազգային հանրութեան, այդ շարքին եւ Ալպանիոյ աջակցութիւնը, որպէսզի Ատրպէյճանը զերծ մնայ հայկական մշակութային ժառանգութիւնը ոչնչացնելէ եւ աղաւաղելէ:
Դեսպան Լուելա Հայտարական արձագանգած է` Ալպանիոյ կառավարութիւնը քաջատեղեակ է ստեղծուած իրավիճակին, եւ պատրաստակամութիւն յայտնած է մտահոգութիւնները փոխանցելու Ալպանիոյ կառավարութեան:
ԿԳՄՄ նախարարին տեղակալը դեսպան Լուելա Հայտարական նաեւ հրաւիրած է մասնակցելու 5-10 Սեպտեմբերին Հայաստանի մէջ ՙSTARMUS VI. 50 տարի Մարսի վրայ՚ փառատօնին` տեղեկացնելով, որ Հայաստանի մէջ նախատեսուած միջոցառման պիտի մասնակցին շուրջ հինգ տասնեակ աշխարհահռչակ գիտնականներ, ճարտարապետներ եւ տիեզերագնացներ, երաժշտութեան եւ արուեստի համաշխարհային դէմքեր, այդ շարքին` Նոպէլեան մրցանակակիրներ, արհեստագիտութեան ոլորտի ներկայացուցիչներ:
