Արցախի Հանրապետութեան նախագահ Արայիկ Յարութիւնեան Ֆէյսպուքի իր էջով տեսանիւթ հրապարակած է` ներկայացնելով 2020 թուականի պատերազմէն յետոյ Արցախի մէջ իրականացուող բնակարանաշինութեան մեծածաւալ աշխատանքները:
Տեսանիւթին մէջ կը նշուի, որ 2021 թուականէն մինչեւ 2022 թուականի Յուլիս ամիսը Արցախի Հանրապետութեան կառավարութեան կողմէ տրամադրուած է աւելի քան 1000 բնակարան` կառուցապատման, երկրորդային շուկայէն ձեռքբերման, բնակարանային ֆոնտի վերանորոգման շնորհիւ: Անոնցմէ 377-ն նորակառոյց բնակարաններ են` հիմնականին մէջ Ստեփանակերտի մէջ, որոնք կառուցուած են Արցախի եւ Հայաստանի հանրապետութիւններու պետական միջոցներու եւ ՙՀայաստան՚ համահայկական հիմնադրամի ֆինանսաւորմամբ:
Բնակարաններու եւ բնակելի տուները տրամադրուած են զոհուած անձերու ընտանիքներուն, տեղահանուածներուն, առաջին խումբի անժամկէտ զինուորական հաշմանդամութիւն ունեցողներու, բանակի գործող եւ պահեստազօրի զինուորներու, 5 եւ աւելի զաւակ ունեցող ընտանիքներուն, փախստականի կարգավիճակ ստացած ընտանիքներուն եւ ծնողազուրկ անձերու ընտանիքներուն:
ՙ2022 թուականին շահագործման պիտի յանձնուի շուրջ 600 բնակարան եւ բնակելի տուն, որուն շուրջ 90 տոկոսը` շրջաններուն մէջ՚, տեսանիւթին մէջ կը նշէ Արցախի Հանրապետութեան բնակարանային հարցերու կոմիտէի նախագահ Արմէն Մանկասարեան:
Անոր խօսքով` ներկայ պահուն Ստեփանակերտ քաղաքին մէջ մօտ 1300 բնակարանի շինարարական աշխատանքներ սկսած են, շրջաններուն մէջ այդ թիւը կը հասնի մօտ 1500-ի: Եւս 1000 բնակարանի, բնակելի տան նախագծանախահաշուարկային փաստաթուղթերը պատրաստ են ու յառաջիկային անոնց շինարարութիւնը պիտի սկսի:
ՙՀանրապետութեան մէջ բնակարանային հաշուառման հերթացուցակներուն մէջ արդէն ունինք մօտ 8500 ընտանիք: Կը կարծեմ, որ այս շինարարական կշռոյթներով յառաջիկայ տարիներուն հնարաւոր պիտի ըլլայ անոնց հարցը լուծել՚, կ՛ընդգծէ Արմէն Մանկասարեանը:
