ՀՀ կառավարութիւնը հաստատեց Ատրպէյճանի կողմէ 2016 եւ 2020 թուականներուն սանձազերծուած ռազմական գործողութիւններուն մասնակցած գործազուրկ անձերու մասնագիտական ուսուցման կազմակերպման եւ զբաղուածութեան ապահովման ծրագիրը: ՀՀ աշխատանքի եւ ընկերային հարցերու նախարար Նարեկ Մկրտչեան նշեց, որ համապատասխան աջակցութեամբ հնարաւորութիւն պիտի տրուի պատերազմին մասնակից գործազուրկ անձերու համալրել գործատուներու մօտ առկայ թափուր աշխատատեղիները:
ՙԾրագիրը ունի երեք բաղադրիչ: Առաջինը կը վերաբերի շահառուին համար մինչեւ 5 ամիս տեւողութեամբ մասնագիտական ուսուցման: Այդ կրնայ կազմակերպուիլ գործատուի մօտ, ուսումնական հաստատութեան մէջ, միասնական ընկերային ծառայութեան կողմէ առաջարկուող հաստատութեան մէջ: Երկրորդ բաղադրիչը կ՛ենթադրէ երեք ամիս տեւողութեամբ փորձաշրջան գործատուի մօտ: Երրորդ բաղադրիչին համաձայն, երբ գործատուն կը համարէ, որ շահառուի պարագային յաւելեալ ուսուցման, փորձաշրջանի կարիք չկայ, ապա կ՛ընդունի աշխատանքի ու կը ստանայ միանուագ աջակցութիւն՚, ըսաւ նախարարը:
Ուսուցման ամբողջ ժամանակահատուածին շահառուին կ՛առաջարկուի վճարել` ուսման վարձի փոխհատուցում ամսական կտրուածքով` իւրաքանչիւր ամսուան համար առաւելագոյնը 50.000 դրամի չափով, կրթաթոշակ` ՙՆուազագոյն ամսական աշխատավարձի մասին՚ Հայաստանի Հանրապետութեան օրէնքի 1-ին յօդուածով սահմանուած նուազագոյն ամսական աշխատավարձի 50 տոկոսի չափով:
Մասնագիտական ուսուցման դասընթացքի աւարտական վկայականը ստանալէ յետոյ շահառուին հետ գործատուն կը պարտաւորուի կնքել աշխատանքային պայմանագիր` առնուազն մէկ տարի ժամկէտով: Աշխատանքային պայմանագիրը կնքելէ յետոյ մէկ տարի ժամկէտով, ամսական կտրուածքով, գործատուին կ՛առաջարկուի տրամադրել գումար առաւելագոյնը 50.000 դրամի չափով` շահառուի աշխատավարձէն հաշուարկուող եկամտային յարկը, դրոշմանիշային վճարը եւ օրէնքով սահմանուած դէպքերուն` ընկերային վճարը փոխհատուցելու համար:
Գործատուին մօտ աշխատանքային փորձառութիւն կազմակերպելու պարագային գործատուին կ՛առաջարկուի տրամադրել փոխհատուցում` շահառուի աշխատավարձի վճարման համար` ՙՆուազագոյն ամսական աշխատավարձի մասին՚ Հայաստանի Հանրապետութեան օրէնքի 1-ին յօդուածով սահմանուած չափով, ամսական կտրուածքով, երեք ամիս ժամկէտով. շահառուի աշխատավարձէն հաշուարկուող եկամտային յարկը, դրոշմանիշային վճարը եւ օրէնքով սահմանուած դէպքերուն` ընկերային վճարը փոխհատուցելու համար, երեք ամիս ժամկէտով` իւրաքանչիւր ամսուայ համար առաւելագոյնը 25.000 դրամի չափով եւ 9 ամիս ժամկէտով` իւրաքանչիւր ամսուան համար առաւելագոյնը 50.000 դրամի չափով:
Նախագիծով կ՛առաջարկուի նաեւ ծրագրի շրջանակին մէջ 300.000 դրամի չափով միանուագ փոխհատուցում տրամադրել այն գործատուին, որ առնուազն մէկ տարի ժամկէտով աշխատանքային պայմանագիր կը կնքէ գործազուրկ անձի հետ:
ՀՀ վարչապետ Նիկոլ Փաշինեանի խօսքով` իրենց դիտարկումները ցոյց կու տան, որ պատերազմի մասնակիցները աշխատանք գտնելու հետ կապուած խնդիրներ կ՛ունենան: Անոնք մասնագիտական որոշակի հմտութիւններ ձեռք բերելու կարիք ունին: Քննարկումներու շնորհիւ որոշուեցաւ իրականացնել այս ծրագիրը ` պատերազմի մասնակից տղաներուն աջակցելու համար:
