ՀՀ Մարդու իրաւունքներու պաշտպան Քրիսթինէ Գրիգորեան ընդունած է Գերմանիոյ Պունտեսթակի փոխնախագահ Քաթրին Կէօրինկ-Էքարտը, Հայաստանի մէջ Գերմանիոյ փոխդեսպան Մարքուս Չանը, Հայնրիխ Պէօլ հիմնադրամի Հարաւային Կովկասի մէջ տարածաշրջանային գրասենեակի ղեկավար Սոնիա Շիֆերսը եւ հայաստանեան ծրագրերու համակարգող Էւիա Յովհաննիսեանը:
Ողջունելով հիւրերը` Գրիգորեան ներկայացուցած է հաստատութեան մանտաթը եւ աշխատանքին հիմնական ուղղութիւնները:
Զրոյցի ընթացքին Քաթրին Կէօրինկ-Էքարտ շնորհաւորել է Գրիգորեանը Մարդու իրաւունքներու պաշտպան ընտրուելու առիթով:
Վերջինիս առաջարկով Գրիգորեան անդրադարձած է մարդու իրաւունքներու ոլորտին մէջ առկայ հիմնական մարտահրաւէրներուն, յատկապէս` յետպատերազմեան շրջանին մարդասիրական խնդիրներուն, այդ շարքին` Ատրպէյճանի մէջ պահուող ռազմագերիներու եւ քաղաքացիական անձերու վերադարձին, վերջիններուս եւ անհետ կորսուած անձերու ընտանիքի անդամներուն ընկերաային աջակցութեան եւ հոգեբանական օգնութեան տրամադրման հարցերուն, սահմանամերձ համայնքներու անվտանգութեան եւ այլ խնդիրներուն, ինչպէս նաեւ խտրականութեան դէմ պայքարին եւ կանանց քաղաքական ու տնտեսական հզօրացման առնչուող հարցերուն:
Քաթրին Կէօրինկ-Էքարտ հետաքրքրուած է նաեւ Մարդու իրաւունքներու պաշտպանի անկախութեան երաշխիքներով, ՀՀ կառավարութեան, միջազգային կազմակերպութիւններու հետ Պաշտպանի հաստատութեան համագործակցութեան հարցերով, ինչին ի պատասխան Գրիգորեան ներկայացուցած է կառավարութեան հետ համագործակցութեան մեխանիզմները, ինչպէս նաեւ Պաշտպանի աշխատակազմի եւ միջազգային կազմակերպութիւններուն միջեւ համագործակցութեան հիմնական ուղղութիւններն ու համատեղ իրականացուող ծրագրերը:
Հանդիպման ընթացքին Հայնրիխ Պէօլ հիմնադրամի ներկայացուցիչները անդրադարձած են տարածաշրջանին եւ Հայաստանի մէջ հիմնադրամին կողմէ իրականացուող ծրագրերուն, աշխատանքի հիմնական ուղղութիւններուն եւ Հայաստանի մէջ հիմնադրամի առաջնահերթութիւններուն:
