Պաշտօնական այցով Լեհաստան գտնուող Հայաստանի արտաքին գործերու նախարար Արարատ Միրզոյեանը հանդիպում ունեցած է երկրի փոխվարչապետ Եացեք Սաշինի հետ:
Զրուցակիցները գոհունակութեամբ նշած են դիւանագիտական յարաբերութիւններու հաստատումէն ի վեր 30 տարիներու ընթացքին միջպետական յարաբերութիւններու զարգացումն ու առկայ աշխուժութիւնը:
ՀՀ արտաքին գործերու նախարարը նշած է, որ Լեհաստանը Հայաստանի կարեւոր եւրոպական գործընկերներէն է:
Արարատ Միրզոյեանը եւ Եացեք Սաշինը քննարկած են երկու երկիրներու տնտեսական համագործակցութեան զարգացման հեռանկարները` երկուստեք պատրաստակամութիւն յայտնելով ջանքեր գործադրելու` ուղղուած առեւտրատնտեսական ներուժի լիարժէք իրացման, ներդրումային հնարաւորութիւններու ստեղծման եւ գործարար շրջանականերու միջեւ կապերու աշխուժացման:
Նախարար Միրզոյեան նշսծ է, որ 2018 թուականէն ի վեր Հայաստանի կառավարութիւնը անհաշտ պայքար սկսած է փտածութեան դէմ, ինչպէս նաեւ գործարար միջավայրի բարելաւման ծաւալուն բարեփոխումներ իրականացուած են, ինչ որ լաւ հնարաւորութիւններ կը ստեղծէ օտարերկրեայ ներդրողներու համար:
Կողմերը կարեւորած են Վարշաւայի ֆոնտային պուրսային կողմէ Հայաստանի ֆոնտային պուրսայի բաժնետոմսերու հսկիչ փաթեթի ձեռքբերումը, ինչ որ մեծ հնարաւորութիւններ կը ստեղծէ դրամագլուխի շուկային մէջ Հայաստանի ու Լեհաստանի համագործակցութեան համար:
Ընդգծուած է հայ-լեհական տնտեսական համագործակցութեան միջկառավարական յանձնաժողովի գործունէութեան դերը` որպէս արդիւնաւէտ հարթակ, համատեղ ծրագրերու քննարկման եւ գործնական քայլերու նախանշման համար: Այս ծիրին մէջ զրուցակիցները կարեւորած են նաեւ գործարար պատուիրակութիւններու փոխայցելութիւնները եւ համաժողովներու կայացումը:
Հանդիպման ընթացքին նախարար Միրզոյեան ներկայացուցած է նաեւ հայկական կողմին դիրքորոշումը Լեռնային Ղարաբաղի հակամարտութեան խաղաղ հանգուցալուծման, Հայաստանի եւ Ատրպէյճանի միջեւ յարաբերութիւններու կարգաւորման վերաբերեալ:
