ՀՀ պաշտպանութեան նախարար Սուրէն Պապիկեանը, Զինուած ուժերու Գերագոյն շտաբի պետին ուղեկցութեամբ, այցելած է երկրորդ բանակային զօրամիաւորում: Պաշտպանական գերատեսչութեան ղեկավարը շրջած է զօրամիաւորման ենթակայ զօրամասերուն մէջ, ծանօթացած է թիկունքային ապահովման աշխատանքներուն, զօրքերու մարտական պատրաստութեան ընթացքին:
Սուրէն Պապիկեանը զօրամիաւորման հրամանատարական կազմին հետ քննարկած է անձնակազմի մարտունակութեան ամրապնդման, ենթակառուցուածքներու արդիականացման եւ զօրամասերու շէնքային պայմաններու բարելաւման հետ կապուած շարք մը հարցեր:
Այնուհետեւ պաշտպանութեան նախարարը այցելած է արեւելեան սահմանագօտի, շրջած է մարտական դիրքերուն մէջ եւ հետեւած է առաջնագիծի կահաւորման աշխատանքներուն:
Զօրամասին հրամանատարը զեկուցած է առաջնագիծին վրայ կատարուած շինարարական եւ ամրաշինական աշխատանքներուն, անձնակազմի անվտանգութեան ուղղուած միջոցառումներուն մասին:
Պաշտպանութեան նախարարը վստահեցւոցած է, որ առաջնագիծի անվտանգութեան ապահովման հետ կապուած բոլոր խնդիրները պատշաճ կերպով պիտի ուսումնասիրուին եւ պիտի լուծուին:
Նախարարը զօրամիաւորման սպայակազմի եւ մարտական հերթապահութեան մէջ ընդգրկուած զինուորներուն հետ քննարկումներու ընթացքին անդրադարձած է նաեւ Զինուած ուժերուն մէջ մեկնարկած բարեփոխումներուն, զինուորներու ընկերային ապահովութեան առնչուող ծրագրերուն, հաւաստիացնելով, որ այդ խնդիրները մշտապէս կը գտնուին երկրի ռազմաքաղաքական ղեկավարութեան ուշադրութեան ներքոյ:
