5-10 Սեպտեմբերին Հայաստանը պիտի վերածուի աշխարհահռչակ գիտնականներ, տիեզերագնացներ եւ արուեստի գործիչներ միաւորող հարթակի` հիւրընկալելով STARMUS միջազգային փառատօնը: Գիտութեան, արհեստագիտութիւններու եւ արուեստի ուղղութիւններու զարգացման աջակցելու նպատակով հեռահաղորդակցութեան ոլորտին մէջ առաջատար Team Telecom Armenia ընկերութիւնը յայտարարած է STARMUS փառատօնի հետ համագործակցութեան մասին:
ՙԱջակցելով Starmus-ին` մենք կ՛աջակցինք մեր երկրին մէջ գիտութեան հանրայնացման ու կ՛ոգեշնչենք երիտասարդները` աւելի աշխոյժ ու համարձակ քայլեր անելու: Յոյսով եմ, որ այս փառատօնը կը դառնայ անկախ Հայաստանի մէջ գիտութեան վերածնունդի խորհրդանշական իրադարձութիւններէն մէկը` ապագային վերականգնելով աստղագիտութեան ոլորտին մէջ ունեցած մեր համբաւը՚, նշեց Team Telecom Armenia ընկերութեան գլխաւոր տնօրէն Հայկ Եսայեանը:
Փառատօնը Հայաստանի մէջ պիտի կրէ ՙSTARMUS VI. 50 տարի Մարսի վրայ՚ խորագիրը եւ նուիրուած պիտի ըլլայ Հրատի (Մարսի) վրայ ՙՄարս 3՚ տիեզերակայանի առաջին վայրէջքի 50-ամեակին: Յատկանշական է, որ ՙՄարս 3՚-ը տեղափոխած է դէպի Կարմիր մոլորակ հայ մեծանուն ճարտարապետ Ալեքսանտր Քեմուրճեանի Prop-M (փրոփ-էմ) ռոպոթը:
ՙԿ՛ողջունեմ Team Telecom Armenia ընկերութիւնը մեր փառատօնի շրջանակներուն մէջ եւ որպէս հայ ուրախ եմ միջազգային գործընկերներու շարքին ունենալու առաջին հայաստանեան ընկերութիւնը, որ միացած է փառատօնին որպէս հիմնական գործընկերներէն մէկը` կարեւորելով գիտութեան հանրայնացումը Հայաստանի համար: STARMUS-ը աննախադէպ միջազգային իրադարձութիւն է եւ այստեղ` Հայաստանի մէջ մենք գիտութեան տօն պիտի պարգեւենք հանրութեան ու հիւրերուն՚, խօսելով համագործակցութեան մեկնարկին մասինª ըսաւ STARMUS փառատօնի համահիմնադիր Գարիկ Իսրայէլեանը:
Միջոցառումներուն Հայաստանի մէջ պիտի մասնակցին շուրջ հինգ տասնեակ աշխարհահռչակ գիտնականներ, Նոպէլեան մրցանակակիրներ, ճարտարապետներ եւ տիեզերագնացեր, երաժշտութեան եւ արուեստի համաշխարհային աստղեր: Փառատօնի ծրագրին մէջ (starmus.com/Armenia) կը նախատեսուին համագումարներ ու գիտաժողովներ, բազմաբնոյթ մշակութային միջոցառումներ, գիտական ճամբարներ, որոնք գիտութիւնը, արուեստն ու երաժշտութիւնը իւրովի պիտի ներկայացնեն հանրութեան, այդ շարքին` Երեւանէն դուրս:
STARMUS փառատօնը հիմնադրուած է աստղաբնագէտ Գարիկ Իսրայէլեանի ու առասպելական Queen խումբի կիթառահար, աստղաբնագէտ Պրայըն Մէյի կողմէ եւ 2011 թուականէն տեղի ունեցած է Սպանիոյ, Նորվեկիոյ, Զուիցերիոյ մէջ: Փառատօնը կը համարուի միակը աշխարհի մէջ, որ նման մասշտաբի միջոցառումներ եւ խօսնակներ կ՛ունենայ:
