Կիւմրի համայնքի ղեկավարի տեղակալ Դաւիթ Առուշանեանը եւ Ռուսիոյ Դաշնութեան Թվերի քաղաքապետ Ալեքսէյ Օկոնքովը Թվերոի մէջ ստորագրած են համագործակցութեան համաձայնագիր, որուն համաձայն Կիւմրին եւ Թվերը կը դառնան քոյր քաղաքներ:
Ալեքսէյ Օկոնքովի հետ զրոյցի ընթացքին Դաւիթ Առուշանեանը ընդգծած է մշակոյթի, մարմնամարզի, տեղեկատուական արհեստագիտութիւններու, զբօսաշրջութեան եւ թեթեւ արդիւնաբերութեան ոլորտներուն մէջ Կիւմրիի ունեցած ներուժն ու աղբիւրները:
ՙՍտորագրուած համաձայնագիրը երկու քաղաքներու բարեկամական յարաբերութիւններու ամրապնդման առաջին քայլն է: Փոխգործակցութիւնը համակարգելու, փոխադարձ հետաքրքրութիւն ներկայացնող հարցերու շուրջ կարծիքներու փոխանակման նպատակով պիտի կազմակերպուին աշխատանքային հանդիպումներ եւ պատուիրակութիւններու փոխայցեր, տեղի պիտի ունենան խորհրդակցութիւններ եւ բանակցութիւններ, անհրաժեշտութեան պարագային պիտի ստեղծուին աշխատանքային խումբեր` համագործակցութեան տարբեր ոլորտներու մէջ: Պայմանաւորուեցանք նպաստել նաեւ Կիւմրիի եւ Թվերի միջեւ գործարար կապերու ստեղծման՚, մանրամասնած է Դաւիթ Առուշանեանը:
Ալեքսէյ Օկոնքովը իր հերթին շեշտած է, որ Թվերի մէջ շարք մը ոլորտներու զարգացման գործին մէջ իր ներդրումը ունի նաեւ հայ համայնքը` ի դէմս Թվերի մէջ բնակող կիւմրեցիներու:
