Յունաստանի մէջ Հայաստանի Հանրապետութեան արտակարգ եւ լիազօր դեսպան Տիգրան Մկրտչեան այցելած է Յունաստանի Ազգային գրադարան եւ հանդիպած է գրադարանի տնօրէն Սթաւրոս Զումպուլաքիսին: Դեսպան Մկրտչեանը գրադարանի նախագահին ուղեկցութեամբ շրջած է գրադարանին մէջ, ծանօթացած է այնտեղ պահուող գրականութեան, հրատարակութիւններուն, բացառիկ գիրքերուն, ինչպէս նաեւ ելեկտրոնային եղանակով ընթերցողներու սպասարկման կազմակերպման գործընթացին:
Հանդիպման ընթացքին զրուցակիցները ընդգծած են միջգրադարանային համագործակցութեան, շփումներու, փոխայցելութիւններու եւ փորձի փոխանակման կարեւորութիւնը` միջմշակութային եւ կրթական կապերու ամրապնդման եւ զարգացման գործին մէջ: Կողմերը քննարկած են համատեղ միջոցառումներ անցընելու հեռանկարները:
Դեսպան Մկրտչեանը Յունաստանի Ազգային գրադարանին շարք մը գիրքեր նուիրած է` Հայոց ցեղասպանութեան պատմութեան, հայ ժողովուրդի պատմութեան եւ մշակոյթին վերաբերեալ` յոյս յայտնելով, որ գրականութիւնը իր արժանի տեղը կը զբաղեցնի Յունաստանի Ազգային գրադարանին մէջ:
