Հիմնադրուած է Հայաստանի մարզական ծրագրաւորման ֆետերասիոնը` ՀՀ կրթութեան, գիտութեան, մշակոյթի եւ մարմնակրթութեան նախարար Վահրամ Տումանեանի նախագահութեամբ:
Հայաստանի մարզական ծրագրաւորման ֆետերասիոն հասարակական կազմակերպութիւնը ՀՀ քաղաքացիներուն, օտարերկրեայ քաղաքացիներու, քաղաքացիութիւն չունեցող անձերու եւ իրաւաբանական անձերու հասարակական միաւորում է, որ ունի ոչ-առեւտրային կազմակերպութեան կարգավիճակ:
Կազմակերպութեան նպատակներն են Հայաստանի մէջ մարզական ծրագրաւորման զարգացումը, ծրագրաւորման ողիմպիականներու դերի մեծացումը` նպաստելով միջազգային մրցոյթներու մէջ Հայաստանի դպրոցականներու եւ ուսանողներու արդիւնքներու բարելաւման:
Նորաստեղծ ֆետերասիոնը քայլերու պիտի ձեռնարկէ ՀՀ ամբողջ տարածքին ծրագրաւորման մրցոյթներ կազմակերպելու, ողիմպիական ծրագրաւորմամբ հետաքրքրուող ուսանողներու եւ դպրոցականներու համար ուսումնական հաւաքներ կայացնելու ուղղութեամբ: Առաջնային խնդիրներէն են մրցոյթներու համար ծրագրերու ապահովման նախագծումը եւ մշակումը, կայքերու պատրաստումը, ինչպէս նաեւ մարզական ծրագրաւորման ուսումնական ծրագիրներու եւ ձեռնարկներու պատրաստումը եւ տպագրումը, ուսումնամեթոտական հետազօտութիւններու իրականացումը:
Ֆետերասիոնը պիտի աջակցի տարածաշրջանային, հանրապետական եւ միջազգային կապերու հաստատման եւ համագործակցութեան զարգացման` օժանդակութիւն ցուցաբերելով Հայաստանի դպրոցականներու եւ ուսանողներու` ծրագրաւորման միջազգային ողիմպիականներուն եւ հաւաքներուն մասնակցութեան:
Նորաստեղծ ֆետերասիոնի կանոնադրութեամբ կը սահմաուի, որ իր առջեւ դրուած նպատակներն ու խնդիրները իրականացնելու համար Հայաստանի մարզական ծրագրաւորման ֆետերասիոնը կը համագործակցի պետական կառավարման եւ տեղական ինքնակառավարման մարմիններու, միջազգային եւ օտարերկրեայ համանման կազմակերպութիւններու, Հայաստանի մէջ արձանագրուած այլ կազմակերպութիւններու հետ:
Կազմակերպութեան անդամ կրնայ դառնալ 18 տարին լրացուցած, ՀՀ կամ օտարերկրեայ ոեւէ քաղաքացի, ինչպէս նաեւ քաղաքացիութիւն չունեցող անձ կամ իրաւաբանական անձ, որ կ՛ընդունի կազմակերպութեան կանոնադրութեամբ սահմանուած նպատակները եւ կը փափաքի մասնակցիլ անոր գործունէութեան:
Կազմակերպութեան անդամ դառնալու ցանկութիւն ունեցող անձը գրաւոր կը դիմէ կազմակերպութեան գործադիր մարմինին` նախագահին: Կազմակերպութեան անդամներուն համար անդամավճար չի սահմանուիր:
Նախարարութենէն կը յիշեցնեն, որ այս տարուայ Ապրիլին Երեւանի պետական համալսարանին մէջ տեղի ունեցած է աշխարհի ամենահին, ամենամեծ եւ ամենահեղինակաւոր ծրագրաւորման մրցոյթի` ICPC-ի (ՙԱյ Սի Փի Սի՚)` Հիւսիսային Եւրասիոյ տարածաշրջանային աւարտակական փուլը, որուն արդիւնքով ԵՊՀ ՙYerevan SU-2813՚ խմբակը հասաւ աւարտական:
Մրցոյթի աւարտականը 2023 թուականին տեղի պիտի ունենայ Եգիպտոսի մէջ:
Հայաստանի մարզական ծրագրաւորման ֆետերասիոնի կազմին մէջ ընդգրկուած են այդ մրցոյթի ակունքներուն կանգնած անձեր:
