Յետընտրական

«Ձիեր գողանալու համար չէ,

  որ մարդկանց հանում 

են կախաղան, այլ որպէսզի

 այլեւս  ձի չգողանան»։

Անգլիական

Թէեւ քաղաքական կրքերը չեն հանդարտւում, իսկ մտաւոր պառակտումները աւելի թէժացած են ՀՀ Ընտրական Կեդրոնական Յանձնաժողովը (ԿԸՅ) ծանուցեց ընտրութիւնների վերջնական արդիւնքները, նշելով եւ ընդգծելով, որ որեւէ փոփոխութիւն չի եղել  4331 սխալ հաշուարկուած քուէների  առիթով, եւ հաստատուեց Սահմանադրական դատարանի կողմից, ուստի խորհրդարան մտնելու իրաւունք են ստանում «ՔՊ»-ն (49,74%) եւ «Ուժեղ Հայաստան» (23,27%), «Հայաստան» դաշինքները (9,92%), իսկ «Բարգաւաճ Հայաստան»ը կրկին չհատեց անհրաժեշտ 4 տոկոսի շեմը  այդ խմբին մասնակից լինելու:

Սկզբունքօրէն անհանդուրժելի է, երբ աւելի քան տասնեակ համալսարան, բարձրագոյն տարբեր ուսումնական, գիտութիւնների կաճառ եւ բազում գիտական եւ հետազօտական  կեդրոններ ունեցող երկրում չեն կարողանում քուէարկութեան արդիւնքը թղթի վրայ գրանցել առանց սխալի,  որի հետեւանքով վերահաշուարկը ձգձգուեց եւս մէկ շաբաթ, թէեւ գիտակից ենք, որ անսխալ մարդ չկայ, բայց ոչ՝ երբ գործը անհատական  բնոյթի չէ:

ԿԸՅ-ը ի վերջոյ եզրակացրեց, որ 3 ընտրական  տեղամասերում  եղած խախտումների հետեւանքով քուէարկութեան անվաւեր ճանաչումը չի ունենայ որեւէ ազդեցութիւն ընդհանուր արդիւնքի վրայ, հետեւաբար տեղի չ՛ունենար վերաքուէարկութիւն, ինչպէս պահանջած էին ընդդիմադիր ուժերը:

Անսկզբունք, անբնական քաղաքական մթնոլորտը, որ կայացել էր  ընդդիմադիր-իշխանական թեւերի միջեւ, նողկանքի էր արժանի: Բացակայ էին յարգանքի ու պատշաճութեան նուազ կանոնները: Ամիսներ տեւող ընտրապայքարի օրերին կողմերի մէջ որեւէ մտքի փոխանակում չի եղել, իսկ հեռատեսիլով հանրային բանավէճը՝ դարձել փոխադարձ անվայել լուտանքի ու նսեմացումի ամպիոն:

Շատերն են անդրադարձել այդ փաստի անպատշաճ մակարդակին եւ խնդրոյ  կարեւոր համազգային աստիճանի լինելը լուրջ ուշադրութեան է արժանի:

Բազում են նաեւ արձագանգներ դրսից թէ ներսից, ունենալով զանազան նպատակ ու ցուցմունք: Ոմանք այն կարծիքի են, թէ ընտրութիւնները տեղի են ունեցել անպատշաճ պայմաններում, իսկ ոմանք մասամբ կասկածի տակ են դնում ընտրական գործընթացի ազատ, արդար եւ մրցանակային բնոյթը:

Անպակաս են հիւսիսից հնչած սպառնալիքները Հայաստանի՝ Եւրոպայի նկատմամբ որոշ հակումներ ցուցադրելու համար, թէպէտ  հայ իշխանաւորները բազմիցս եւ ամէն առիթով յայտարարեցին, որ մտադիր չեն հեռանալ Մոսկուայի ղեկավարութեամբ գործող  Եւրասիական տնտեսական միութիւնից, բայց ուղիղ խօսքը բոլորին հասանելի չէ եւ շարունակուեցին պատժամիջոցների  կիրառումը  հայ գիւղմթերքների առաքման  արգելումով:

Միւս կողմից, Եւրոմիութիւնը խոստանում է աջակցել ՀՀ-ին՝ Ռուսիոյ աճող ճնշումին դիմակայելու:

Չեմ հաւատում, թէ այս երկու հսկաները եւ նրանց հետ բոլոր միւսները անհանգստացած լիեն մէկ ակնթարթ անգամ մեր երկրի բարեկեցութեան  կամ օգտակար լինելու իմաստով: Մեր նկատմամբ ցուցաբերած կեղծ մտահոգութիւնների ակունքը իրար հակադրուելու համար լրացուցիչ գործիք ունենալն է, ոչ աւել եւ ոչ պակաս:

Մեր նոր ընտրեալ պետական գործիչները պարտաւոր են հաշուի առնել՝ ականջի օղ անելով հնացած այն ասոյթն ու հանգամանքը, թէ երկրների յարաբերութիւնների պարագային բոլոր զգացումները մեռած են եւ գործում է միայն շահոյթը: Նշենք, որ Արտաքին հետախուզութեան ծառայութեան ռուս տնօրէնը յայտնեց, որ եթէ ՀՀ ղեկավարութիւնը կողմնորոշուի բացառապէս Արեւմուտքի օգնութեան եւ  աջակցութեան վրայ, ապա մեծ սխալ ու վերջը վատ է:

Լռութեան չմատնուեց ընդդիմադիր ամբոխը՝ 18 խմբից բաղկացած անհամասեռ ուժը, որ բարձրաձայնում է, թէ  ընտրութիւններն անօրինական են, քանզի, ըստ իրենց գնահատականի, տեղի են ունեցել մի շարք համակարգային  խախտումներ, որոնք ենթադրեալ  ազդեցութիւն են ունեցել ընտրողների  վրայ:

Ողբալի է, որ մեր երկրում դեռ կան բնակիչներ, որոնք կարողանում են համակրել  նախկիններին, մինչեւ իսկ ընտրական խումբ կազմել նրանց հետ եւ պայքարել ինչ որ աթոռի համար, մոռանալով Հոկտեմբեր 27-ը եւ միւս ոճիրները, իսկ 18 ընտրական ընդդիմադիր խմբի ներկայութիւնը ընտրացուցակում, ընդամէնը 3 միլիոն բնակչութեան համար, անհեթեթութեան  վերջին անյայտ տեսակն է:

Աւելի խոհեմ եւ մտաւոր լինելու իրաւունք ունենք: