Հ.Մ.Ը.Մ.-ի Հալէպի մասնաճիւղին կազմակերպութեամբ, 24 Մայիս 2026-ին, Հ.Մ.Ը.Մ.-ի մարզադաշտին մէջ հանդիսաւորապէս մեկնարկած միջդպրոցական ոտնագնդակի մրցումները համախմբած է Հալէպի հայկական վարժարաններու մարզական խումբերը առողջ մրցակցութեան եւ մարզական ոգիի շուրջ։
Կիլիկեան վարժարանի ոտնագնդակի խումբը եւս արժանիօրէն մասնակցած է մրցաշարքին՝ փուլ առ փուլ արձանագրելով յաջողութիւններ եւ իր հետեւողական ու բարձր մակարդակի խաղով իր տեղը ապահոված է եզրափակիչ մրցումին։
Մրցաշարքի աւարտական հանդիպումը տեղի ունեցած է Կիրակի, 28 Յունիս 2026-ին։ Կիլիկեանի մարզիկները դրսեւորելով կազմակերպուած, գեղեցիկ խաղ, 2-1 արդիւնքով արժանի յաղթանակ մը տարած են Մխիթարեան վարժարանի խումբին դէմ՝ հռչակուելով մրցաշարքի ախոյան։
Այս գեղեցիկ յաջողութեան առիթով առանձնայատուկ գնահատանքի խօսք պէտք է յղել մարզիչ Երուանդ Ճիյէրճեանին, որուն անխոնջ աշխատանքը, հետեւողական ջանքերն ու նուիրումը մեծապէս նպաստած են խումբին այս արժանաւոր յաղթանակին եւ ախոյանական բաժակին արժանանալուն։
Ջերմ շնորհակալութիւն նաեւ Կիլիկեան շրջանակի Տիկնանց միութեան եւ անոր ատենապետուհի տիկ. Հուրի Սուլահեանին, որոնք իրենց գնահատանքի գեղեցիկ արտայայտութեամբ յուշանուէրներ յանձնած են իւրաքանչիւր մարզիկի՝ արժեւորելով անոնց ցուցաբերած ջանքն ու նուիրումը։
Նորանոր յաղթանակներու եւ նուաճումներու մաղթանքներով կը շնորհաւորենք Կիլիկեան վարժարանի կարգապահ բոլոր մարզիկները, որոնք իրենց յանձնառութեամբ ու միասնական ոգիով բարձր պահած են իրենց վարժարանին անունը։ Միաժամանակ, երախտագիտութիւն կը յայտնենք բոլոր անոնց, որոնք իրենց ներկայութեամբ եւ խանդավառ քաջալերանքով զօրավիգ կանգնած են խումբին ամբողջ մրցաշարքին ընթացքին։
