Թէեւ Լիբանանի եւ ամբողջ տարածաշրջանի ներկայ քանդիչ պատերազմն ու տիրող մտահոգիչ կացութիւնը կը ծանրաբեռնէ մեր առօրեան, սակայն ան չի կրնար մեզ հեռացնել մեր յիշողութենէն այն նուիրեալ կրթական-մշակութային դէմքերը, որոնք երկար տարիներ պայքարած են այս վիրաւոր-հիւրընկալ երկրին մէջ, հոն ծնած ու մեծցած, սերունդներ դաստիարակած եւ այսօր, դառն ճակատագրով, առյաւէտ մեզմէ բաժնուած են։
Այդ նուիրեալներէն էր Վերժին Աբրահամեանը, որուն մահուան տարելիցին առիթով, յարգանքով եւ երախտագիտութեամբ կը յիշենք անոր կեանքն ու հարուստ վաստակը։
Վերժին Չերչեան Աբրահամեանը երկար տարիներ ծառայեց որպէս ուսուցչուհի Սահակեան-Լեւոն Մկրտիչեան գոլէճին մէջ, միաժամանակ իր գրական եւ մշակութային հետաքրքրութիւնները իրագործեց որպէս «Փթիթ» մանկապատանեկան պարբերաթերթի խմբագրուհի՝ մեծ սիրով աշխատելով հայ մանուկին համար կրթական ու արժէքաւոր բովանդակութիւն ստեղծելու ուղղութեամբ։
Այս տարելիցին առիթով, մեր պաշտօնակից Պոլսոյ «Նոր Մարմարա»-ն արդէն իսկ մահախօսական մը հրատարակած էր երկու շաբաթ առաջ։ Մենք զայն կ’արտատպենք մեր էջերուն մէջ, միեւնոյն ատեն «Նոր Մարմարա»-ին միացնելով մեր ցաւակցութիւնները եւ արտայայտելով մեր խոր վշտակցութիւնը իր ամուսնոյն՝ թերթիս բարեկամ պրն. Կարօ Աբրահամեանին, ինչպէս նաեւ ընտանիքի անդամներուն, հարազատներուն եւ անոր յիշատակը յարգողներուն։
(Ա.)
ՈՂԲ. ՎԵՐԺԻՆ ԱԲՐԱՀԱՄԵԱՆԻ ՄԱՀՈՒԱՆ ՏԱՐԵԼԻՑԸ
Ռամազանի տօնի արձակուրդի օրերուն կը լրանայ Պէյրութի «Փթիթ» մանկապատանեկան հանդէսի ողբացեալ խմբագրապետուհի Վերժին Չերչեան Աբրահամեանի մահուան տարելիցը։ Ան, երկարատեւ եւ անողոք հիւանդութեան դէմ պայքարէ մը ետք, իր մահկանացուն կնքած էր 20 Մարտ 2025-ին, խոր սուգի մատնելով իր ամուսինը, թերթիս պատուակալ աշխատակից, գրականագէտ՝ Կարօ Աբրահամեանը, բարեկամներն ու մշակութային շրջանակները։
Վերժին Աբրահամեան նուիրեալ մշակութային գործիչ մըն էր, որ սերտ կապ պահած էր հայ կրթական ու գրական կեանքին հետ։ Թէեւ տնտեսագիտութեան շրջանաւարտ էր Պէյրութի Ամերիկեան համալսարանէն, սակայն իր իրական կոչումը գտած էր գիրի եւ մամուլի աշխարհին մէջ։ Տասնամեակներ շարունակ հետեւած էր հայագիտական կեանքին եւ իր գիտելիքները ծառայեցուցած՝ ստեղծագործ աշխատանքի մէջ։
Ան յատկապէս յիշատակելի կը մնայ որպէս «Փթիթ» մանկապատանեկան պարբերականի հիմնադիրն ու խմբագիրը, զոր մեծ նուիրումով ղեկավարեց տարիներ շարունակ՝ տղոց գրասեղանին վրայ դնելով կրթական ու գունագեղ բովանդակութեամբ հանդէս մը, իսկ վերջին տարիներուն որպէս կայքէջ մը։ Իր մահէն ետք «Փթիթ» կայքէջը երկու անգամ ունեցաւ նոր յաւելուածներ, յառաջիկայ օրերուն երրորդ յաւելուածը եւս տեղ պիտի գտնէ կայքէջին վրայ։
Մահուան տարելիցին առթիւ յարգանքով կ’ոգեկոչենք Վերժին Աբրահամեանը, վերանորոգելով մեր ցաւակցութիւնները իր հարազատներուն, յատկապէս ամուսնոյն՝ Կարօ Աբրահամեանին։
ՆՈՐ ՄԱՐՄԱՐԱ
