«Ինչպէս որ Քրիստոս մեռելներից յարութիւն առաւ
Հօր փառքով, նոյնպէս եւ մենք քայլենք նոր կեանքով»
(Հռ. 6.4)
Սիրելի հաւատաւոր ժողովուրդ,
Այսօր, համախմբուած եկեղեցիներում, տօնում ենք մեր Տէր Յիսուս Քրիստոսի Սուրբ եւ Հրաշափառ Յարութիւնը։ Փառաբանում ենք Աստուածորդուն, որ մեր փրկութեան համար յանձն առաւ ամէն զոհողութիւն, չարչարանքներ կրեց, խաչուեց, թաղուեց եւ յարութիւն առաւ։ Փրկչի Յարութեամբ լուսաւորուեց նոր կեանքի ճանապարհը։ Ադամական մեղքով Աստծուց հեռացած եւ մահուան իշխանութեանը ենթակայ մարդկութեանը Փրկիչ մեր Տէրը՝ Յիսուս, կոչեց յարուցեալ կեանքի, որպէսզի ազատուելով չարի ու մահուան կապանքներից արժանի լինի տէրունական փրկարար շնորհներին եւ ժառանգի երկնքի արքայութիւնը։ «ինչպէս որ Քրիստոս մեռելներից յարութիւն առաւ Հօր փառքով, նոյնպէս եւ մենք քայլենք նոր կեանքով»,- պատգամում է առաքեալը։
Տիրոջ փրկագործութեամբ մարդուն տրուեց աստուածային օրհնութիւնը՝ զղջումով վերադառնալու առ Երկնաւոր Հայրը եւ տառապանքների խաւարից գտնելու վերյառնումի լուսաւոր ուղին։ Քրիստոսապարգեւ յարուցեալ կեանքը սկսւում է, սիրելիներ, սրտի եւ հոգու նորոգութեամբ, երբ անհատը զօրանում է հաւատով, ապրում Աստծոյ ներկայութեամբ, դառնում նոր արարած, արարում բարին ու գովելին։ Քրիստոսի Յարութեան հաւատով եւ տէրունաւանդ պատուիրանների իրագործմամբ է հնարաւոր հրաժարուել խոտոր ընթացքներից, յաղթահարել ժամանակի դժուարութիւնները եւ քայլել սիրոյ, ճշմարտութեան ու արդարութեան շաւիղներով, ինչպէս յորդորում է առաքեալը. «Ընթացէ՛ք ինչպէս լուսոյ որդիներ. քանզի լուսոյ պտուղներն են բարութիւնը, արդարութիւնը եւ ճշմարտութիւնը» (Եփ. 5.8-9)։
Յիրաւի, Յարութեան հաւատով է բացուելու մարդկութեան պատմութեան նոր այգաբացը, բարեփոխուելու՝ աշխարհը, եւ իրականացուելու՝ համընդհանուր խաղաղութեան ու անվտանգութեան արդար յոյսերը։ Աշխարհի խառնաշփոթում, սակայն, թւում է, թէ խլացել են առաքեալի յորդորն ու աւետարանական պատգամները, եւ Աստծոյ արարչագործութիւնը անարգւում ու վտանգւում է չարագործութիւններով ու անօրինութիւններով, մարդկութեան կեանքն ալեկոծւում ու խորտակւում է հակամարտութիւններով, թշնամանքով ու պատերազմներով։ Բարօր ու արդար աշխարհ հաստատելու համար ներկայ բազմադէմ սպառնալիքների պայմաններում ազգերն ու պետութիւնները առաւել նախանձախնդրութեամբ պիտի հետամուտ լինեն Բարձրեալ Աստծոյ կամքին՝ յաղթահարելու համար առկայ ծանր փորձութիւնները, ամրապնդելու հիմքերը համամարդկային համերաշխութեան, խաղաղ համակեցութեան եւ արդիւնաւոր գործակցութեան։ Համընդհանուր այսպիսի ջանքերով է, որ ժողովուրդներն «իրենց սուսերներից խոփեր պիտի ձուլեն եւ իրենց սուիններից՝ մանգաղներ. ազգ ազգի վրայ սուր չպիտի բարձրացնի, եւ նրանք այլեւս չեն սովորելու պատերազմել»,- ինչպէս ազդարարում է մարգարէն (Եսայի 2․4)։
Սիրելիներ, արցախեան ողբերգական պատերազմից տարիներ անց տակաւին տագնապներն ու մտահոգութիւնները չեն լքում մեր սրտերը, որ տենչում են խաղաղութիւն ու անվտանգութիւն։ Մեր ժողովուրդը լաւագոյնս գիտի արժէքը խաղաղութեան ու անվտանգութեան, որի համար ազգիս զաւակները վճարել են իրենց կեանքով։ Դեռ թարմ են մեր կրած վշտերն ու վէրքերը, որոնց ցաւն այսօր աւելի է խորանում արցախահայութեան իրաւունքների ոտնահարումով, պատանդառուած մեր հայրենակիցների ապօրինի ազատազրկմամբ։ Ցաւը խորանում է, երբ շարունակւում է սերմանուել պառակտումի որոմը, երբ անտեսւում ու խեղաթիւրւում են նուիրական արժէքները, երբ գործադրւում է կամայական ու ընտրովի արդարադատութիւն, եւ կեղծ ու շինծու մեղադրանքներով իշխանութիւնների կողմից բռնաճնշումներ են իրականացւում Եկեղեցու նկատմամբ։ Եկեղեցին Քրիստոսով անսասան է, հզօր եւ աներեր։ Եկեղեցին Աստծոյ տունն է, հաւատացեալների հաւաքականութիւնը, իր փրկարար առաքելութեամբ խաղաղութեան, եղբայրսիրութեան ջատագովն ու աւետարանողը, Քրիստոսի հրաշափառ Յարութեան անլռելի քարոզիչը։ Եկեղեցին յարուցեալ կեանքի հրաւէրն է մշտապէս բարձրաձայնում՝ իր զաւակներին զերծ պահելու համար յուսահատութիւնից, անիրաւութիւններից ու անկումներից, զերծ պահելու հայրենական եւ ազգային անդաստանը՝ կորստաբեր ճանապարհներից։ Յարուցեալ կեանքը երբեք չի կարող լինել միմեանցից օտարացմամբ ու բաժանումներով, քրիստոնէական արժէքների խեղմամբ, Եկեղեցու առաքելութեան նսեմացմամբ ու սահմանափակմամբ, ազգային շահերը խեղաթիւրելով, արդարութիւնն ու ճշմարտութիւնը աղճատելով։ Մինչեւ չմերժենք չար գործերն ու կորստաբեր քայլերը, չենք կարող հաստատել զարթօնք ու ծաղկում, առաջադիմութիւն ու բարօրութիւն անձնական ու հասարակական կեանքում եւ կերտել մեր ժողովրդի յարատեւութեան անխորտակելի հեռանկարները։
Արդ, սիրելիներ, Հայրապետական Մեր պատգամն է՝ նախընտրենք բարին ընդդէմ չարիքի, հաշտութիւնն ընդդէմ խառնակչութեան, ազնուութիւնն ու ուղղամտութիւնը՝ ընդդէմ կեղծիքների ու խարդաւանքների, փոխադարձ յարգանքն ու զօրակցութիւնը՝ ընդդէմ անպատուութեան ու նենգադաւութեան։ Առաջնորդուենք վնասակար ու կործանարար երեւոյթները բացառելու յանձնառութեամբ, մեր պարտութիւններից ոտքի կանգնելու հաստատակամութեամբ եւ նախնեաց ժառանգութիւնը անաղարտ պահպանելու նախանձախնդրութեամբ։ Գերադասենք սէրը, համերաշխութիւնը, միասնութիւնը, որպէսզի համատեղ ջանքերով կարող լինենք վեր յառնել մեզ պատուհասած նեղութիւններից ու դժուարութիւններից, ամրապնդել մեր պետականութիւնը եւ կերտել ազգի առաջընթացն ու բարգաւաճումը։ Միշտ հաւատարիմ մնանք յարուցեալ մեր Տիրոջը, Ով «իր անձը տուեց մեզ համար, որպէսզի մեզ փրկի ամէն անօրէնութիւնից եւ մաքրի որպէս Իրեն սեփական ժողովուրդ՝ նախանձախնդիր բարի գործերի» (Տիտ. 2.14):
Սուրբ Յարութեան ուրախալի աւետիսով Միածնաէջ Մայր Տաճարից եղբայրական Մեր ողջոյններն ենք յղում Առաքելական մեր Սուրբ Եկեղեցու Նուիրապետական Աթոռների Գահակալներին՝ Ն.Ս.Օ.Տ.Տ. Արամ Ա. Մեծի Տանն Կիլիկիոյ կաթողիկոսին, Երուսաղէմի Հայ պատրիարք Ամենապատիւ Տ. Նուրհան արքեպիսկոպոս Մանուկեանին, Կոստանդնուպոլսի Հայոց պատրիարք Ամենապատիւ Տ. Սահակ արքեպիսկոպոս Մաշալեանին, մեր Սուրբ Եկեղեցու ուխտապահ ողջ հոգեւոր դասին: Մեր ողջոյնն ենք յղում ի Քրիստոս Մեր հոգեւոր եղբայրներին՝ քոյր Եկեղեցիների Պետերին, եւ իրենց հաւատաւոր հօտին: Հայրապետական Մեր սէրն ու օրհնութիւնը՝ ազգային ու հոգեւոր արժէքներին նախանձախնդիր մեր ժողովրդին։ Հայրական Մեր գնահատանքը ձեզ ամէնքիդ, սիրելիներ, առ հայրենին եւ մեր Սուրբ Եկեղեցին հանապազ դրսեւորուող հաւատարմութեան եւ ջերմ նուիրումի համար։ Մենք ամէն օր զգացել եւ շարունակում ենք զգալ ձեր աղօթքի զօրութիւնը։ Ձեզնով է շէն ու անսասան մեր Սուրբ Եկեղեցին, որին դարերի փորձութիւններն անգամ չեն խորտակել։ Ձեզնով է զօրեղ, ամուր ու լուսափայլ Մայր Աթոռ Սուրբ Էջմիածինը։ Շարունակէք ապրել աղօթքով, գործէք ու արարէք առ հայրենին ու Մայր Եկեղեցին սիրով՝ ի նպաստ մեր երկրի շինութեան ու լուսաւոր գալիքի։
Հոգենորոգ այս օրը միասնաբար աղօթք բարձրացնենք առ յարուցեալ Աստուածորդին, որ Իր անբաւ ողորմութեամբ պարգեւի խաղաղութիւն ու ապահովութիւն համայն աշխարհին եւ հայրենի մեր երկրին։ Հայցենք, որ երկնային կենարար շնորհներով զօրանայ աշխարհասփիւռ մեր ժողովուրդը, ապրի հաւատով ներշաղախ կեանքով, դժուարութիւնները յաղթահարելու խիզախ ու անկոտրում ոգով։ Աղօթենք, որ համազգային մեր անդաստանում հաստատուն լինեն ճշմարտասիրութիւնը, արդարամտութիւնն ու միաբանութիւնը, որպէսզի բարի արգասիքներով, ազգաշահ ու հայրենօգուտ նորանոր ձեռքբերումներով կերտենք ապագայատեսիլ մեր ժողովրդի իղձերն ու ձգտումները՝ ի փառս Աստծոյ եւ ի յաւէտ պայծառութիւն ազգի եւ Առաքելական մեր Սուրբ Եկեղեցու։
Աղօթենք նաեւ պատերազմի արհաւիրքներից տառապող մեր եղբայրների ու քոյրերի, ապօրինաբար ազատազրկուածների, անյայտ կորածների ու նրանց ընտանիքների, այլեւ նեղութիւնների ու զրկանքների մէջ գտնուողների, ապաքինման կարօտ անձանց համար։
Թող Աստծոյ ամենախնամ Աջը, սէրը եւ օրհնութիւնները հովանի լինեն մեզ ամէնքիս այսօր եւ միշտ եւ յաւիտեանս. ամէն։
Քրիստոս յարեաւ ի մեռելոց,
Օրհնեալ է Յարութիւնն Քրիստոսի:
