Վաղը, 13 Փետրուարին, յետմիջօրէի ժամը 2։15-ին, Սաֆայի մարզադաշտը պիտի հիւրընկալէ 3-րդ դասակարգի Լիբանանի ախոյանական մրցումներուն յատկանշական հանդիպումը՝ Պէյրութի Հ.Մ.Մ. ընդդէմ «Շապէպ Մաժտ էլ Այնճար»-ի։ Այս ճակատումը կու գայ ախոյանութեան 9-րդ շաբթուան ծիրին մէջ եւ կարեւոր նշանակութիւն ունի երկու կազմերուն համար։
Ինչպէս կանխատեսելի էր, նախորդ մրցումը դիւրին չեղաւ հայկական խումբին համար։ Հիւրընկալուելով՝ ան դէմ-յանդիման եկաւ ամէն գնով յաղթանակ կորզելու վճռակամութեամբ պատրաստուած մրցակիցի մը։ «Կարմիրներ»-ը քիչ մնաց որ ճաշակէին իրենց առաջին պարտութեան դառնութիւնը, սակայն մարտական ոգին եւ յամառ պայքարը ի վերջոյ պտուղ տուին։ Մրցումը աւարտեցաւ 2-2 հաշտութեամբ։ Նշենք, որ նախորդ վեց մրցումներէն ընդամէնը երկու կոլ ընդունած Հ.Մ.Մ.-ի բերդը, միայն Սայտայի մէջ նոյնքան կոլ ստացաւ։
Վերադառնալով վաղուան վճռորոշ հանդիպման, Այնճարի կազմը կրնկակոխ կը հետեւի Պէյրութի Հ.Մ.Մ.-ին, աղիւսակին մէջ ընդամէնը մէկ միաւորի տարբերութեամբ գրաւելով երկրորդ հորիզոնականը։ «Լիուա Սայտա»-ի նման, ան ալ ունի միայն մէկ պարտութիւն (1-0), որ կրեց նոյնինքն Հ.Մ.Մ.-էն՝ երթի մրցումին ընթացքին։ Ասիկա կը նշանակէ, որ վաղուան խաղի ընթացքին հայկական կազմէն եկող ամէն փոքր անուշադրութիւն կամ սայթաքում կրնայ ճակատագրական դառնալ աղիւսակի դիրքային դասաւորման համար։
Անհրաժեշտ է շեշտել, որ ցանկալի յաղթանակին պարագային «Կարմիր սատանաներ»-ը պիտի վայելեն չորս միաւորի ապահով տարբերութիւն մը, հաւանաբար մինչեւ ախոյանութեան առաջին հանգրուանի աւարտը՝ ամրապնդելով իրենց առաջատար դիրքը։
Այս ակնկալութիւնը շօշափելի իրականութեան վերածելու համար, մարզիչն ու մարզիկները միայնակ չեն կրնար կրել ամբողջ պատասխանատուութիւնը։ Մեծագոյն դերը պիտի պատկանի Հ.Մ.Մ.-ի հաւատարիմ համակիրներուն։ Վաղուան յաղթանակը անոնց մասնակցութեամբ պիտի կերտուի, անոնց ձայնով ու քաջալերանքով։ Ախոյանութեան վճռորոշ փուլերուն մօտեցող այս հանգրուանին, խումբը առաւել քան երբեք կարիք ունի իր համակիրներուն կենդանի աջակցութեան։
Ուստի վերահաստատենք մեր կոչը․
Բոլորս դէպի մարզադաշտ — Հ.Մ.Մ.-ի հետ, մինչեւ վերջ։
