Այս Շաբաթ, 7 Փետրուարին, կէսօրէ ետք ժամը 2:15-ին, Լիբանանի ֆութպոլի երրորդ դասակարգի ախոյանութեան դարձի առաջին շաբթուան մրցումներու ծիրին մէջ, «Իմամ Մուսա Սատր» մարզադաշտին վրայ, Հ.Մ.Մ. պիտի հիւրընկալուի «Էլ Լիուա Սայտա» խումբէն։
Մրցակից կազմը ներկայիս 11 միաւորով կը զբաղեցնէ աղիւսակին երրորդ հորիզոնականը։ Ան իր հաշուոյն ունի երեք յաղթանակ, երկու հաւասարութիւն եւ միայն մէկ պարտութիւն, որ գրանցուած է Հ.Մ.Մ.-էն՝ 1-0 արդիւնքով, 11 Դեկտեմբերին կայացած երթի՝ անդրանիկ ճակատման ընթացքին։
Վեց մրցումներէ ետք Սայտայի ֆութպոլիստները զգալի փորձառութիւն կուտակեցին, մօտէն ուսումնասիրեցին առաջատար Հ.Մ.Մ.-ի խաղային մտածողութիւնը, թեքնիքական մօտեցումներն ու մարզիկներու անհատական ոճերը։ Հետեւաբար, Հ.Մ.Մ.-ի համար այս մրցումը դիւրին առաքելութիւն մը չի խոստանար, մանաւանդ որ կը կայանայ մրցակիցին համար նպաստաւոր մարզավայրի մը մէջ։
Այնուամենայնիւ, վստահ ենք, որ Հ.Մ.Մ.-ի տղաքը պիտի կարենան շրջանցել բոլոր դժուարութիւնները, ցուցադրել իրենց մարտական ոգին ու կազմակերպուած խաղը, եւ տուն վերադառնան աղիւսակին վրայ իրենց 16 միաւորը երեքով աւելցուցած։
Այս լաւատեսութեամբ ալ կը վերահաստատենք մեր միութենական կոչը․
Բոլորս դէպի մարզադաշտ՝ Հ.Մ.Մ.-ի հետ, մինչեւ վերջ։
