«Եւ Բանն մարմին եղեւ եւ բնակեաց ի մեզ» – «Եւ Բանը մարմին եղաւ եւ մեր մէջ բնակեցաւ»:
(Յովհ. Ա, 14)
Աստուած կը մարդանայ, իր աչքերը լոյսին կը բանայ գոմի մը անհիւրընկալ կիսամութին մէջ, կը փաթթուի խանձարուրով ու կը դրուի յարդէ խշտիքի՝ մսուրի մը տրտում խոնարհութեան մէջ։ Աստուած կը դառնայ պարզ ու սովորական անձ մը՝ քեզի եւ ինծի պէս։ Անըմբռնելի եւ շատերու համար նոյնիսկ անընդունելի յայտարարութիւն մը։ Ինչպէ՞ս կրնայ ըլլալ… Տիեզերքի եւ միլիառաւոր համաստեղութիւններու, տեւողութեան ու տարածութեան, կեանքի եւ սիրոյ Արարիչը մեր մոլորակին վրայ կը դառնայ պարզ մարդ, կ’ըլլայ զաւակը խոնարհ ընտանիքի մը, ու կը մտնէ մեր ժամանակի եւ պատմութեան մէջ։ Յիսուս Քրիստոս՝ Աստուած կատարեալ եւ միաժամանակ մարդ կատարեալ։
Ուղղակի ապշած ենք Մարդեղութեան անիմանալի խորհուրդին առջեւ, իսկ ուրիշներ իրենց գլուխը կը շարժեն՝ գուցէ իրաւացի թերահաւատութեամբ։ Արդեօ՞ք մենք՝ մարդիկս, արարիչ Աստուծոյ տնօրինումներուն ընդամէնը մէկ մասը կը կազմենք։ Ի՞նչ ծրագրեր ունինք մենք, եւ ի՞նչ ծրագրեր ունի Աստուած մեզի համար։
Երեմիա մարգարէ աւելի քան 2500 տարի առաջ կը պատգամէ այն, որ լսած է Աստուծմէ.
«Քանզի ձեզի համար միայն ես գիտեմ իմ ծրագրերը, կ’ըսէ Տէրը, ծրագիր մը փրկութեան եւ ո՛չ չարիքի, ձեզի ապագայ եւ յոյս մը տալու» (Եր. ԻԹ, 11)։
Աստուած յոյս կը շնորհէ մեզի, փրկութեան երաշխիք՝ զայն աւետելու նաեւ մեր հարազատ շրջապատին եւ ուրիշներուն։ Յոյս, որ կ’առաջնորդէ մեզ մեր անորոշութեան, փորձութիւններուն եւ անկումներուն ընդմէջէն։ Ան կ’ամրապնդէ մեր վստահութիւնը, կը զօրացնէ հաւատքը եւ մեր աչքերը կը բանայ ապագայի լոյսին դիմաց։
Սուրբծննդեան տօնը յոյսի, սիրոյ, խաղաղութեան եւ մարդկութեան հանդէպ Աստուծոյ անընդմիջելի մերձակայութեան երաշխիքն է։ Յիսուս Քրիստոսի ծնունդով երաշխաւորուած այս պարգեւը մի՛շտ կը շնորհուի մեզի, նաեւ այս նոր տարիին, եւ հետագայ բոլոր ժամանակներուն։
Ձեզի եւ ձեր ընտանիքներուն սրտանց կը մաղթեմ լոյսով եւ տիրախնամ օրհնութեամբ օծուն Ս. Ծնունդ, նաեւ շնորհաբեր Նոր տարի մը, որ ձեզ առաջնորդէ խաղաղութեամբ, երջանկութեամբ եւ առլցուն ստեղծագործ ձեռքբերումներով։
Քրիստոս ծնաւ եւ յայտնեցաւ – Օրհնեալ է Յատնութիւնն Քրիստոսի։
Մնամ ձերդ սիրալիր եւ ջերմ ողջունիւ՝
Դոկտ. Աբէլ քհնյ. Մանուկեան
Նկարը. Ուոլթերս պատկերասրահ, Աւետարան, թ. 539, 208բ, ծաղկող՝ Թորոս Թոսլին, վայր՝ Հռոմկլա՞, 1262 թ.։
