Իսկապէս ցաւալի է մեր ազգային ներկան:
Ֆէյսպուքի էջերուն վրայ Փաշինեանն ու իր համակիրները գրեթէ ամէնօրեայ ներկայութեամբ ընդդիմադիր ճակատի համակիրներուն հետ ծիծաղելի մրցումի ելած են՝ դաւանելով պաշտպանները ըլլալ Հայց. առաքելական եկեղեցւոյ:
Եւ անոնք, որոնք Պաղ պատերազմի շրջանին ճեղք եւ բաժանում ստեղծած էին Էջմիածնի եւ Անթիլիասի կաթողիկոսական աթոռներուն միջեւ՝ պայքարելով իր սրբութեամբ եւ հայրենասիրութեամբ մաքրամաքուր հայրապետ Վազգէն Ա. կաթողիկոսին դէմ, ծիծաղելիօրէն այսօր դարձած են պաշտպանը Էջմիածինի գահակալ Գարեգին Բ.-ի:
Կուսակցականացած շահեր պայքարի մէջ են պետական շահերու դէմ, եւ այդ պայքարին բերումով, ինչպէս անցեալին, այսօր ալ տուժողը մեր Եկեղեցին է:
Այս անախորժ երեւոյթը Հայաստանի նախկին եւ ներկայ վարչակարգերուն միջեւ զզուելի իրողութիւն մը դարձած է, որ հայ չէզոք ազնիւ մարդուն հանգիստը կը խանգարէ եւ զայն Եկեղեցիէն կը հեռացնէ:
Ժողովրդային պոռթկումի առաջնորդ Նիկոլ Փաշինեանն ու իրեն գործակից խումբը, 2018 թուականէն ասդին, առիթը չեն փախցներ անցեալի վարչակարգը իրաւացիօրէն մրոտելու, եւ ամէն ինչին հինի ու նորի բաղդատականը ընելով՝ կը շարունակեն «շահագործել» ժողովուրդի լայն զանգուածին ատելութիւնը հիներուն նկատմամբ: Եւ նկատի ունենալով, որ յառաջիկայ տարուան ընտրութիւններուն Փաշինեանի ընդդիմադիր ճակատ հանդիսանալիքը այդ հիներուն կողմէ մղուելու երեւոյթը ցոյց կու տայ, ներկայ իշխանութիւնը ժողովուրդին ատելութիւնը հիներուն դէմ ի գործ դնելով՝ երբեք մտահոգ ըլլալ չի թուիր, վստահ ըլլալով իր յաղթանակին:
Հայաստանի մարդկային իրաւունքներու նախկին պաշտպան Արման Թաթոյեան, որ կը յաւակնի վարչապետի պաշտօնին, ուղղած է շատ խելացի յորդոր մը նախկին նախագահներ Ռոպերթ Քոչարեանին եւ Սերժ Սարգսեանին՝ ըսելով. «Եթէ կ’ուզէք Փաշինեանը պարտուի, պէտք չէ մասնակցիք 2026-ի ընտրութիւններուն»: Արդարեւ, 2018 թուականի Թաւշեայ յեղափոխութիւնը եղաւ մեր հայրենի ժողովուրդին պոռթկումի եւ զայրոյթի արտայայտութիւնը նախկին նախագահներուն դէմ, որոնք ամբողջ քսան տարի սանձարձակ իշխելով՝ անօրինականութիւնը դարձուցին միջոց՝ իշխանաւորը հարստացնող եւ ժողովուրդը աղքատացնող:
Հայաստան պէտք է ԱՅԼԵՒՍ դարձնէ էջը իր «հին»-ի եւ «նոր»-ի, «մենք»-ի եւ «ձեր»-ի անվերջ խօսոյթին, որ իշխանութեան կ’ընծայէ առիթ՝ ցեխարձակելու ընդդիմադիրներներուն դէմ եւ փոխադարձաբար ցեխարձակուելու անոնց կողմէ որպէս «հող ծախող», «թուրք» կամ «դաւաճան»:
Իսկապէս զզուելի դարձած է չէզոք կամ հեռուէն դիտող հայուն նման խօսոյթի մը շարունակ լսող կամ հետեւող ըլլալը: Արման Թաթոյեանի՝ նախկին նախագահներուն ըրած յորդորը տեղին է եւ հարկաւոր, որպէսզի հիները պատճառ չդառնան իրենց կրած ատելութեան պատճառաւ փաշինեանականներուն վերընտրութիւնը յաջողցնելու: Եթէ Փաշինեան. եւ իր գործակիցները վերընտրուիլ ուզեն ժողովուրդին մեծամասնութեան կողմէ, թող այդ ըլլայ իրենց վարչակարգին կողմէ ձեռք բերուած յանձնառութիւններու եւ նուաճումներու հիման վրայ եւ ոչ նախկիններուն կողմէ կատարուած մսխումներու եւ անօրինութիւններու մատնանշումով: Հետեւաբար, նոր ուժերու եւ անոնց կողմէ առաջարկուող ծրագրերու կամ յայտագրերու կարիքը ունի մեր հայրենի ժողովուրդը, որպէսզի ընտրել կարենայ ներկայինին հետ բաղդատելի ապագայ իշխանութիւն մը, եւ ոչ՝ հինին հետ բաղդատելի: Գիտենք, որ բազում տարիներու վրայ երկարող իշխանութիւն մը ժողովրդավարութեան քօղի տակ կը դառնայ բռնատիրութիւն մը: Չենք ուզեր այդ տեսնել փաշինեանականներու իշխանութեան ներքոյ:
2018 թուականէն ետք, եւ եօթը տարիներու վրայ, Հայաստանը զեղծարարներէ եւ աւազակներէ փրկող Փաշինեանի վարչակարգը այլեւս պէտք է պատրաստած ըլլայ մարդիկ, որոնք անաղարտ նկարագրի տէր ըլլալով եւ գիտութեան աղբիւրով յագեցած՝ հիմը դնեն նոր Հայաստանի մը, որոնք անցեալի խունտային հետքը ջնջելով առիթ չտան նաեւ փաշինեանական մենատիրութեան կամ բռնատիրութեան մը ստեղծումին:
Վերոյիշեալ վերլուծումներու լոյսին տակ եւ նոր տարուան սեմին, երբ մարդիկ մաղթանքներ կը կատարեն աւելի լաւ ապագայի մը յոյսով, պիտի ուզենք մաղթել,– հոգ չէ թէ մեծ յոյս չունինք մեր մաղթանքներուն իրականացման վրայ,
– Որ կիրքերը հանդարտին եւ թշնամութիւնը հեռանայ մեր ազգային տունէն,
– Որ մեր սուրբ Եկեղեցին մնայ դաստիարակիչը մեր վառ յոյզերուն եւ դառնայ սրբողը զինք անամօթաբար շահագործողներուն,
– Որ ատելութիւնն ու քէնը չճեղքռտեն մեզ միացնող եղբայրութիւնը,
– Որ արցախցի բանտարկեալ մեր եղբայրները ազատ արձակուին,
– Որ պարտուած ժողովուրդի մեր խոցոտուած բարոյականը գտնէ միջոցն ու ելքը՝ դառնալու հպարտ ու յաղթական.
– Որ պատերազմներով յղի մեր աշխարհը տկար ազգերը չոտնակոխէ, զօրաւորը աստուածավախ դարձնէ եւ մարդկութեան խաղաղութիւն պարգեւէ:
