Վերջերս «Արարատ»-ի խմբագրատունը հիւրընկալեց պատմաբան, հրապարակագիր եւ խմբագիր Գէորգ Եազըճեանը, որ Հայաստանէն այս օրերուն կը գտնուի Պէյրութ՝ առողջական վերականգնման նպատակով։
Իր գիտական, հրապարակագրական ճանապարհին եւ այն փորձառութիւններուն մասին, որոնց միջով անցած է Եազըճեան վերջին ամիսներուն, մօտ ժամ մը տեւած մեր զրոյցը դարձաւ ինքնաբուխ վերյուշ եւ մտաւորական փոխանակութիւն՝ պատմական, ընկերային ու բարոյական շեշտադրումներով, ուր Եազըճեան յիշատակեց տարիներու իր գործակցութիւնը լիբանանահայ մամուլի եւ մշակութային շրջանակներուն հետ։
Ան ցասումով անդրադարձաւ այն դժուար փորձութիւններուն, որոնց յաճախ կը բախին մարդիկ այն միջավայրերուն մէջ, ուր ենթադրաբար պիտի գտնէին հոգատարութիւն եւ մասնագիտական հաւատարմութիւն։ Եազըճեանի խօսքին մէջ ակնարկ մը կար այն բացերուն եւ թերութիւններուն, որոնք ստիպած են զինք որոնելու աւելի հոգատար պայմաններ այլուր։
Գէորգ Եազըճեան պիտի շարունակէ մնալ Լիբանան՝ բուժման ընթացքը շարունակելու եւ միաժամանակ իր գրական-հրապարակագրական աշխատանքները վերակենդանացնելու նպատակով։ Ան կը պահէ իր սովորական ստեղծագործ ոգին՝ մշտապէս կապուած մնալով հայ պատմական միտքին եւ ազգային արժէքներուն։
«Արարատ»-ի ընտանիքը շուտափոյթ ապաքինում, նոր ոգեշնչում եւ շարունակական արեւային օրեր կը մաղթէ Գէորգ Եազըճեանին:
