Լիբանանի «Մայրիներու անտառի բարեկամներ» կազմակերպութիւնը Պըշարրի գաւառին մայրիներու «Հովանաւորներու անտառին» մէջ կազմակերպեց հովանաւորներուն օրը, որ նուիրուած է նշեալ անտառի ընդարձակումին եւ տարածքի կանաչապատումին աշխատանքը հովանաւորող անձերուն: Անոնք իրենց ընտանիքներուն ընկերակցութեամբ այցելեցին Պըշարրիի լեռնային գօտի ջրեցին իրենց տնկած մայրիները, ստուգեցին անոնց աճը, ամրացնելով նոր սերունդին կապը Լիբանանը խորհրդանշող մայրիի ծառին հետ:
Նշենք, որ «Մայրիներու անտառի բարեկամներ» կազմակերպութիւնը հիմնուեցաւ 26 տարի առաջ, նպատակ ունենալով Լիբանանի լեռնային շրջաններուն մէջ վերականգնել երբեմնի մշտադալար անտառները եւ կենսոլորտային պայմաններ ապահովել՝ պահպանելու հնագոյն մայրիներու կեդրոնացումի վայր համարուող Պըշարրիի «Աստուծոյ մայրիի պուրակը», ուր տակաւին կը գոյատեւէ ընդամէնը 2162 հսկայ ծառ: Իսկ նոր՝ «Հովանաւորներու անտառին» 5,5 միլիոն քառակուսի մեթր տարածութեան մէջ տնկուած է աւելի քան 173 հազար մայրի, շնորհիւ հազարաւոր հովանաւորներու հարիւրական տոլարի նուիրատուութեան:
