Ուքրանիոյ իշխանութիւնները յայտարարեցին, թէ ռուսական ուժերը պատերազմին ցարդ մեծագոյն յարձակումը կատարած են մայրաքաղաք Քիեւի եւ այլ շրջաններու ուղղութեամբ, գործածելով աւելի քան 800 հեռահար հրթիռ եւ անօդաչու սարք, որոնք հարուածած են բազմաթիւ թիրախներ՝ սպաննելով աւելի քան հինգ քաղաքացի՝ ներառեալ երկու հոգի մայրաքաղաքին մէջ: Թիրախաւորումին հետեւանքով նիւթական վնասներ կրեց նաեւ կառավարութեան կեդրոնատեղին: Միացեալ Նահանգներու նախագահ Տոնըլտ Թրամփ դժգոհեցաւ ռուսական լայնածաւալ գործողութենէն, պատրաստակամութիւն յայտնելով շուտով յաւելեալ պատժամիջոցներ սահմանելու Մոսկուայի նկատմամբ:
