Հայաստանի Արտաքին գործերու նախարարութիւնը պատրաստակամութիւն յայտնեց հիւրընկալելու տարածաշրջանային հարցերու կարգաւորումին ուղղութեամբ աշխատող «3+3» ձեւաչափով նախարարական հերթական ժողովը: Նախապէս, Ռուսիոյ Արտաքին գործերու նախարարութիւնը յայտարարած էր, որ այս ձեւաչափով յաջորդ ժողովը կը պատրաստուի եւ գուցէ կայանայ Երեւանի ու Պաքուի մէջ:
Այս ձեւաչափով ընթացող ժողովները կը ներառեն Հայաստանը, Ատրպէյճանը, Վրաստանը եւ Ռուսիան, Թուրքիան, Իրանը, թէեւ Թիֆլիս միշտ մերժած է մասնակցիլ ժողովներուն:
Ղազախստանի նախագահը իր կարգին յայտնեց, թէ կը պատրաստուի հիւրընկալելու Հայաստանի վարչապետն ու Ատրպէյճանի նախագահը՝ շարունակելու համար խորհրդակցութիւնները:
Այսուհանդերձ, ատրպէյճանական լարուածութիւն հրահրող յայտարարութիւնները կը շարունակուին: Պաքու երէկ յայտարարեց, որ «Երեւան պէտք է ջանք թափէ խաղաղութեան համաձայնագրի ստորագրութիւնը յաջողցնելու համար»: Ատրպէյճանի նախագահի յատուկ յանձնարարութիւններու ներկայացուցիչ դեսպան Էլչին Ամիրբեկով նշած է, որ այս փուլին խօսքը միայն նախաստորագրման մասին է, բայց ոչ՝ վերջնական ստորագրման․ «Խաղաղութեան համաձայնագրի ստորագրման եւ իրականացման համար հայկական կողմը պէտք է յստակ քայլեր ձեռնարկէ։ Մասնաւորապէս, Հայաստանի Հանրապետութեան Սահմանադրութիւնը տակաւին կը պարունակէ դրոյթներ, որոնք կը հակասեն Ատրպէյճանի Հանրապետութեան ինքնիշխանութեան եւ տարածքային ամբողջականութեան, արտայայտելով անընդունելի տարածքային պահանջներ։ Ուստի, տեւական խաղաղութիւն հաստատելու համար ՀՀ հիմնական օրէնքը պէտք է համապատասխանեցուի երկու երկիրներուն կողմէ արդէն նախաստորագրուած խաղաղութեան համաձայնագրի բնագրին եւ ոգիին»,- ըսած է Ամիրբեկով։
