Վարչապետ Նիկոլ Փաշինեան Օսաքայի մէջ այցելել է «Expo 2025» համաշխարհային ցուցահանդէս, որու շրջանակներուն մէջ տեղի ունեցած է Հայաստանի ազգային օրուան նուիրուած միջոցառումը:
Վարչապետը ցուցահանդէսի կազմակերպիչներուն ուղեկցութեամբ նախ շրջայց կատարած է ցուցահանդէսի տաղաւարներուն մէջ, այնուհետեւ պատուաւոր հիւրերու յուշամատեանին մէջ գրառում կատարած է: Յաջորդիւ տեղի ունեցած է ճափոնական թէյի աւանդական հիւրասիրութիւն, որուն մասնակցած են վարչապետ Նիկոլ Փաշինեանը, հայկական պատուիրակութեան անդամներն ու Ճափոնի արտաքին գործերու խորհրդարանական նախարարի տեղակալ Հիսաշի Մաթսումոթօն: Վարչապետ Փաշինեան այցելած է ցուցահանդէսին մէջ բացուած հայկական տաղաւար:
«Այսօրուայ եւ վաղուայ սիւները» խորագրով հայկական տաղաւարը կը ներկայացնէ Հայաստանի առաջատար նորարարական ծրագրերը, մշակութային ժառանգութիւնը, ներդրումային հնարաւորութիւնները, յառաջադէմ կրթական նախաձեռնութիւնները: Պատասխանատուները նշած են, որ հայկական տաղաւար այցելուներու թիւը ցուցահանդէսի մեկնարկէն ի վեր գերազանցած է մէկ միլիոնը:
Այնուհետեւ կայացած է Հայաստանի ազգային օրուան նուիրուած միջոցառման բացման արարողութիւնը: Նախ հնչած են Հայաստանի եւ Ճափոնի ազգային օրհներգերը, որմէ յետոյ ելոյթներով հանդէս եկած են վարչապետ Նիկոլ Փաշինեան եւ Համաշխարհային ցուցահանդէսի գլխաւոր յանձնակատարի տեղակալ Շիկեթոշի Իքեյամա:
