Սուրիոյ Սանա լրատու գործակալութիւնը հաղորդեց, թէ արտաքին գործերու նախարար Ասաատ Շէյպանի Փարիզի մէջ առաջին անգամ ըլլալով տեսակցած է իսրայէլեան պատուիրակութեան մը հետ՝ քննարկելու համար տարածաշրջանին եւ Սուրիոյ հարաւային գօտիին անվտանգութիւնը եւ ամրապնդելու կայունութիւնը՝ վերակենդանացնելով 1974-ի զինադադարի համաձայնութիւնը: Իսրայէլեան լրատուամիջոցներ երէկ հաղորդեցին, թէ վերջերս իսրայէլեան վերահսկողութեան տակ անցած Շէյխ լեռան վրայ վիրաւորուած է եօթը զինուոր՝ սուրիական հին ռումբի մը պայթումին հետեւանքով:
Իսկ Սուրիոյ ներքին ապահովութեան ուժերը Հոմս գաւառին մէջ յայտնաբերեցին «Կրատ» տիպի հրթիռներով բեռցուած բեռնակառք մը, որուն վարորդը կը փորձէր հրթիռները փոխադրել Լիբանան: Սուրիական ուժերը խոչընդոտած են բեռնակառքը եւ գրաւած են արգիլուած բեռը:
