Ամերիկացի տարածաշրջանային պատուիրակներ Թոմ Պարրաք եւ Մորկըն Օրթէյկըս Օգոստոսի աւարտին վերստին պիտի այցելեն Լիբանան՝ շարունակելու համար հարաւային կայունութեան պահպանումին քննարկումները: Պարրաք, Օրթէյկըս եւ ՊԷյրութի մէջ ամերիկացի դեսպանը երէկ տեսակցեցան հանրապետութեան երեք պետերուն հետ: Պարրաք հաւաստիացուց, թէ «բոլորս կ’ընթանանք ճիշդ ուղղութեամբ»: Անոր համաձայն, Հըզպալլայի ապազինումը կը բխի շիի համայնքի շահերէն, աւելի լաւ կեանք մաղթելով լիբանանցիներուն եւ շրջանի երկիրներուն:
Հանրապետութեան նախագահ Ժոզէֆ Աուն Պարրաքը ընդունած ատեն պահանջեց, որ «միւս կողմերը յարգեն զինադադարի միացեալ յայտարարութեան բոլոր յօդուածները, յաւելեալ աջակցութիւն տրամադրեն լիբանանեան բանակին եւ արագացնեն կործանուած շրջաններու վերակառուցումին միտող միջազգային համագումարի մը կազմակերպումը»:
Ապա, Այն Թինէի մէջ Պարրաք եւ ամերիկեան պատուիրակութեան անդամները տեսակցեցան խորհրդարանի նախագահ Նեպիհ Պըրրիի հետ: Վերջինս ընդգծեց, որ կայունութեան եւ վերակառուցումի ծրագիրը գործադրելու սկիզբը իսրայէլեան ոտնձգութիւններուն դադրեցումն է եւ սահմանային բռնագրաւեալ շրջաններէն իսրայէլեան ուժերուն նահանջը:
Իսկ վարչապետ Նաուաֆ Սալամ ամերիկացի պատուիրակը վարչապերարանին մէջ ընդունած ատեն Ուաշինկթընին կոչ ուղղեց յաւելեալ ճնշում բանեցնելու Թել Աւիւին վրայ, որպէսզի վերջ դրուի թշնամական ոտնձգութիւններուն, ազատ արձակուին գերիները եւ իսրայէլեան ուժերը հեռանան լիբանանեան սահմանային բլուրներէն: Սալամ կարեւորեց նաեւ ԵՈՒՆԻՖԻԼ-ի խաղաղապահներուն առաքելութեան երկարաձգումը, որպէս կայունութիւնը ամրապնդելու միջոց:
