Ուրբաթ, 18 Յուլիս 2025-ի երեկոյեան, Ժըմէյզէ-Պէյրութի մէջ գտնուող Թէքէեան կեդրոնի 7-րդ՝ «Գերսամ Ահարոնեան» յարկը լուսաւորուած էր արտակարգ գեղարուեստական իրադարձութեամբ: Արդարեւ, բարձր հովանաւորութեամբ Զահլէի քաղաքապետութեան անդամուհի տիկին Գարոլին Զիատէ-Փամպուքեանի (Լիբանանեան ուժեր), տեղի ունեցաւ Լիբանանի հայ գեղանկարիչ-գեղանկարչուհիներու լուսաշող գունազարդ ստեղծագործութիւններու ցուցահանդէս եւ վաճառք:
Բացման ներկայ էին Թէքէեան մշակութային միութեան ատենապետ տոքթ. Յակոբ Փափազեան, նախկին պետական երեսփոխան Յակոբ Գասարճեան, Զահլէի քաղաքապետութեան անդամուհի Գարոլին Զիատէ-Փամպուքեան եւ անոր ընկերակցող պատուիրակութիւնը, պրն. Գօգօ Եկարեանի (ՌԱԿ) գլխաւորութեամբ, «Ահրամճեան» բժշկական եւ մշակութային կեդրոնի տնօրէն Համբիկ Մարտիրոսեան, ինչպէս նաեւ մասնակից գեղանկարիչ-գեղանկարչուհիներ, արուեստասէր ընտրանի, զանգուածային լրատուական միջոցներ: Կատարուեցաւ նաեւ ջերմ հիւրասիրութիւն:
Այս յատկանշական մշակութային իրադարձութեան հովանաւորուհի տիկին Գարոլին Զիատէ-Փամպուքեան հայերէնով, արաբերէնով ու անգլերէնով շնորհակալութիւն յայտնեց «բարի գալուստ»ի խօսքով հանդէս եկած Աւետիս Տիպանին, խոստանալով շարունակել համագործակցութիւնը մշակութային թէ ազգային ամէն բնագաւառներու մէջ, Զահլէի հայոց թէ այլ յարանուանութեանց ղեկավարութեանց եւ անդամներուն հետ, ամրակուռ կամուրջներ հաստատելով հայապահպանման եւ Լիբանանի հայրենիքի գոյատեւման համար: Որոտընդոստ ծափահարութիւններէ ետք, ներկաներուն «հրամցուեցան» ցուցադրուող գեղանկարչական ստեղծագործութիւններն ու վաստակաշատ «վրձինի ու գոյնապնակ»-ի վարպետները՝ Գրիգոր Ակոբեան, Հրաչ Այնթապլեան, Լիւսի Չամսարեան, Անիթա Թութիկեան, Սալբի Սվաճեան, Նորա Տիպան, Լենա Այտընեան, Գրիգոր Արփաճեան, Սմբատ Ղազէլեան եւ Մարալ Ղազարեան:
Ցուցահանդէս-վաճառքը շարունակուեցաւ Շաբաթ եւ Կիրակի՝ 19 եւ 20 Յուլիս 2025-ին:
Այցելուներուն մէջ էին Լիբանանէն ականաւոր դէմքեր, վիրաբոյժներ ու բժիշկներ, հնագէտներ եւ արուեստաբաններ, կրօնական համայնքներու պատկանող հոգեւորականներ, ազգային եւ հասարակական գործիչներ, արուեստասէրներ: Լիբանանի հայութեան այս եզակի ու քաջարի ցուցահանդէսը լայնօրէն մեկնաբանուեցաւ ու տեղադրուեցաւ համացանցի, դիմատետրի եւ այլ զանգուածային տեղեկատուութեան էջերուն մէջ:
