Հանրապետութեան նախագահ Ժոզէֆ Աուն լիբանանցիներուն կոչ ուղղեց միաւորելու իրենց ջանքերը եւ դրսեւորելու պատասխանատու կեցուածք, որպէսզի կարելի ըլլայ Լիբանանը զերծ պահել տարածաշրջանային վտանգաւոր զարգացումներէն: «Նպատակս է խաղաղութիւնը եւ պատերազմէն խուսափումը, որովհետեւ չենք կրնար դիմել պատերազմ հրահրելու արկածախնդրութեան», ըսաւ Աուն:
Վարչապետ Նաուաֆ Սալամ յայտնեց, թէ հարաւային շրջանին մէջ կայունութիւնը պահպանելու հարցով ամերիկացի պատուիրակ Թոմ Պարրաքին մշակած փաստաթուղթը կը բաղկանայ շարք մը գաղափարներէ եւ առաջարկներէ, որոնք կը միտին գործադրելու անցեալ աշնան յայտարարուած զինադադարը, ոչ թէ յայտարարելու զինադադարի նոր համաձայնութիւն մը: «Ես կը զօրակցիմ արաբական նախաձեռնութեան վրայ հիմնուած խաղաղութեան, ոչ թէ բնականոնացումին», շեշտեց Սալամ: Անոր համաձայն աշխատանք կը տարուի բարելաւելու Պարրաքին փաստաթուղթը, ուր կը նշուի, թէ հարաւէն իսրայէլեան նահանջը եւ պետութեան հեղինակութեան ամրապնդումը պէտք է զուգահեռ ընթանան: «Պահանջուած չէ, որ Հըզպալլա զէնքը յանձնէ Իսրայէլին, այլ՝ Լիբանանի պետութեան», ըսաւ Սալամ եւ ցաւ յայտնեց Իսրայէլի կողմէն այդ զէնքին շարունակական թիրախաւորումին համար: Ի տես Սուրիոյ զարգացումներուն, Սալամ շեշտեց, որ Լիբանանի կայունութիւնը կարելի է պահպանել ամրապնդելով ազգային միասնականութիւնը եւ զերծ մնալով վտանգաւոր արկածախնդրութիւններէն: «Մեզի համար շատ կարեւոր է Սուրիոյ կայունութիւնը եւ մենք լաւ գիտենք ներքին բախումներուն վտանգը, որ ապրած ենք երկար տարիներ», ըսաւ վարչապետը եւ կոչ ուղղեց պահպանելու Սուրիոյ կայունութիւնն ու ամբողջականութիւնը: Նաուաֆ Սալամ վստահութիւն յայտեց, որ լիբանանցիները կարողութիւն ունին իրենց երկրէն հեռու պահելու Սուրիոյ իրադարձութիւններէն յառաջացած լարուածութիւնը՝ շնորհիւ լիբանանեան բանակի ջանքերուն, քաղաքական գործիչներու խոհեմութեան եւ լիբանանցիներու աչալրջութեան:
