ՄԱԿ-ի Ապահովութեան խորհուրդը նիստ մը յատկացուց քննարկելու իսրայէլեան յարձակումը: Թեհրան ՄԱԿ-ին տեղեկացուց, թէ այս հարուածով Իսրայէլ հատած է բոլոր կարմիր գիծերը: Միացեալ Նահանգներ յայտարարեց, թէ տեղեակ էր յարձակումին մասին, զայն կը համարէ Իսրայէլի ինքնապաշտպանութեան իրաւունքը, սակայն չէ մասնակցած գործողութեան: Նախագահ Տոնըլտ Թրամփ շեշտեց, որ Թեհրան վերջին շրջանին կորսնցուցած էր համաձայնութեան յանգելու բազմաթիւ առիթներ, մաղթելով որ հարուածէն ետք վերստին կ’ըլլայ համաձայնելու հնարաւորութիւն: Սէուտական Արաբիա, Քաթար, Թուրքիա, Արաբական Միացեալ Էմիրութիւններ, Յորդանան ու շրջանային այլ ուժեր մտահոգութիւն յայտնեցին տեղի ունեցածին առնչութեամբ, կոչ ուղղելով չվտանգելու Միջին Արեւելքի վիճակը եւ հիւլէական հարցը լուծելու համաձայնութեամբ: Ֆրանսայի նախագահ Էմանուէլ Մաքրոն շեշտեց, որ Իսրայէլ ունի ինքնապաշտպանութեան իրաւունք: Իսկ Եւրոմիութիւնը կոչ ուղղեց ինքնազսպումի՝ զերծ մնալով յաւելեալ մագլցումէ:
