Հայաստանի Ազգային ժողովին մէջ մեկնարկած՝ 2024 թուականի պետական պիւտճէի կատարման տարեկան հաշուետուութեան նախնական քննարկումներուն ելոյթ ունենալով, վարչապետ Նիկոլ Փաշինեան ըսաւ, որ 2024-ի պետական պիւտճէի եկամուտները կազմած են 2 թրիլիոն 579 միլիառ 200 միլիոն դրամ:
«Այս թիւն արտայայտում է մեր բոլորի աշխատանքի արդիւնքը՝ վարչապետ, Կառավարութիւն, ԱԺ, Կառավարութեանը ենթակայ մարմիններ, բայց նաեւ քաղաքացիներ: Խօսքը բոլոր քաղաքացիների մասին է: 2024-ին նրանց մի մասն աշխատել է, միւս մասը չի աշխատել: Ի դէպ, ասեմ, որ 2024-ի Նոյեմբերին ՀՀ բոլոր ժամանակների գրանցուած եւ աշխատավարձով ապահովուած աշխատատեղերի բացարձակ մրցանիշ է սահմանուել: Գրանցուել է 782 հազար 832 աշխատատեղ, որը 192 հազար 613-ով կամ 32 տոկոսով ավելի է 2018-ի Նոյեմբերի ցուցանիշից»,- նկատեց վարչապետը:
«Այսինքն՝ 2018 թուականի յեղափոխութիւնից յետոյ Հայաստանում ստեղծուել է 242 հազար 119 աշխատատեղ, ընդ որում՝ աշխատավարձով ապահովուած: Այս վիճակագրութիւնն աւելի քան վստահելի է: 2018 թուականի Ապրիլին ՀՀ-ում միջին աշխատավարձը եղել է 173 հազար 996 դրամ, 2025 թուականի Ապրիլին՝ 304 հազար 992 դրամ: Միջին աշխատավարձի աճը կազմել է 130 հազար դրամ կամ 70 տոկոս»,- մանրամասնեց կառավարութեան ղեկավարը:
