Միացեալ Նահանգներու նախագահ Տոնըլտ Թրամփ խելագար համարեց իր ռուս պաշտօնակից Վլատիմիր Փութինը եւ զգուշացուց, թէ Ուքրանիոյ տիրապետելու որեւէ փորձ պիտի առաջնորդէ Ռուսիոյ փլուզումին: «Միշտ լաւ յարաբերութիւն ունեցած եմ Փութինի հետ, սակայն անոր ինչ որ բան պատահած է ու դարձած է խելագար», ըսաւ Թրամփ, միաժամանակ քննադատելով Ուքրանիոյ նախագահ Վոլոտիմիր Զելենսքին, որ «միայն կը խօսի եւ ոչ մէկ ծառայութիւն կը մատուցէ իր երկրին»:
Նախապէս, Ուքրանիոյ օդուժը յայտարարած էր, թէ Կիրակի գիշեր ռուսերը աւելի քան 355 անօդաչու սարք եւ հեռահար հրթիռ արձակած են մայրաքաղաք Քիեւի եւ այլ քաղաքներու ուղղութեամբ: Այս կը համարուի պատերազմի սկիզբէն ի վեր ռուսական մեծագոյն հարուածը՝ առ ի հակադարձութիւն նախագահ Փութինի ուղղաթիռի սաւառնումին ընթացքին Քուրսք շրջանին վերեւ ուքրանական անօդաչու սարքերու ներկայութեան, որ համարուեցաւ որպէս մահափորձի միտող գործողութիւն:
