Ռուսիոյ արտաքին գործերու նախարար Սէրկէյ Լաւրով խաղաղութիւն կնքելու ջանքերուն վերաբերեալ յաջողութիւն մաղթեց Երեւանին ու Պաքուին, պատրաստակամութիւն յայտնելով շարունակաբար աջակցելու երկու կողմերուն՝ գտնելու համաձայնութեան եզրեր: Լաւրով յայտնեց, որ Երեւանի առաջարկած «Խաղաղութեան խաչմերուկ» նախաձեռնութեան գործադրութիւնը ունի որոշ նախապայմաններ: Լաւրովի համաձայն, որպէսզի նախաձեռնութիւնը գործադրուի եւ հայկական տարածքն ու հնարաւորութիւնները ներառուին միջցամաքամասային մեծ հոլովոյթներուն մէջ, Հայաստան պէտք է նախ եւ առաջ լուծէ իր խնդիրները Ատրպէյճանի եւ Ռուսիոյ հետ: Նշենք, որ Ռուսիոյ արտաքին գործերու նախարարին Երեւան այցելութեան ծրագիրէն չեղարկուեցաւ Ծիծեռնակաբերդ այցելութիւնը: Հայաստանի Արտաքին գործերու նախարարութիւնը յստակացուց, որ նման աշխատանքային այցելութիւններու պարագային ծրագիրը կը մշակէ այցելող կողմը, իսկ հիւրընկալ երկիրը կ’ապահովէ ծրագրի գործադրութեան նախապատրաստական ու արարողակարգային աշխատանքները:
Հայ-ատրպէյճանական խնդիրներու լուծում մաղթեց նաեւ Վրաստանի նախագահ Միխայէլ Քաւելաշվիլին եւ զոյգ երկիրներու կառավարութիւններուն շնորհակալութիւն յայտնեց՝ հակամարտութիւնը դադրեցնելու ուղղութեամբ թափուած ջանքին համար:
