«Ֆրանս փրէս» լրատու գործակալութիւնը հաղորդեց, թէ Լիբանանի մէջ գտնուող պաղեստինեան գաղթակայաններուն մէջ մթերուած զէնքը յանձնելու հոլովոյթը պիտի սկսի Յունիսի կիսուն, ինչպէս որ համաձայնած են նախագահներ Ժոզէֆ Աունն ու Մահմուտ Ապպասը: Որոշուած է գաղթակայաններուն ապազինումը սկսիլ նախ Պէյրութէն, ապա անցնիլ միւս շրջաններուն: Ծրագիրը իրականացնելու համար կազմուած են աշխատանքային միացեալ յանձնախումբեր, որոնց առաջին նիստին ընթացքին վարչապետ Նաուաֆ Սալամ յայտնեց, որ զէնքերու յանձնումը պիտի կատարուի յստակ ժամանակացոյցի մը հիման վրայ:
Նոյն ծիրին մէջ, «Ֆրանս փրէս» լրատու գործակալութիւնը հաղորդեց, թէ Սուրիոյ մէջ տեղակայուած պաղեստինեան զինեալ կազմակերպութիւնները իրենց զէնքը յանձնած են նոր իշխանութիւններուն եւ Դամասկոսէն հեռանալով ապաստանած են շարք մը երկիրներ՝ առաջին հերթին Լիբանան:
