Իսրայէլեան օդուժը անցնող օրերուն շարունակեց ծանրօրէն հարուածել Եմէնի բոլոր շրջանները՝ թիրախաւորելով այդ երկրին մէջ իշխող հուսիներու Անսարալլա կազմակերպութեան դիրքերը եւ ենթակառոյցները: Իսրայէլի վարչապետ Պենիամին Նեթանհահու իր կարգին նշեց, որ հարուածած են Եմէնի նաւահանգիստները, սպառնալով աւելի ծանր հարուածներ ուղղել հուսիներուն, եթէ շարունակուի Իսրայէլի ուղղութեամբ Եմէնի հեռահար հրթիռարձակումները, որոնք վերջերս կը կեդրոնանան Թել Աւիւի շրջանին վրայ: Պաշտպանութեան նախարար Իսրայէլ Քաց իր կարգին յոխորտաց, որ իրենք հուսի առաջնորդին պարագային կրնան ընել այն՝ ինչ ըրին Նասրալլային, Տայֆին եւ դիմադրութեան այլ ղեկավարներու հետ:
