Ընկալեալ աւանդութեան համաձայն, Հ.Մ.Մ.-ի Սկաուտական խորհուրդին առաջնորդութեամբ, 24 Ապրիլի առաւօտեան, Հ.Մ.Մ.-ի սկաուտական կազմը քայլերթով բարձրացաւ Հայ Կաթողիկէ Պատրիարքարան: Հ.Մ.Մ.-ի փողերախումբին եւ սկաուտական վաշտին հետ սոյն երթին մասնակցեցան նաեւ Ս.Դ.Հ.Կ.-ի Վարիչ մարմինի անդամներ, Հ.Մ.Մ.-ի ատենապետն ու վարչական անդամներ եւ համակիրներ: Մասնակիցները նախ ծաղկեպսակ զետեղեցին Հայ Կաթողիկէ Պատրիարքարանի շրջափակին մէջ Ցեղասպանութեան զոհերու յուշակոթողին առջեւ, որմէ ետք արենուշ Արազ Գոճաօղլանեանը ելոյթ ունեցաւ, ուր նաեւ Հ.Մ.Մ.-ի ընտանիքին կողմէ ցաւակցութիւններ փոխանցեց Ֆրանչիսկոս Սրբազան Քահանայապետին վախճանման տխուր առիթով: Սրտի խօսքով հանդէս եկաւ գերյարգելի Հայր Նարեկ ծ. վրդ. Մննոյեանը:
Հայոց ցեղասպանութեան 110-ամեակի ոգեկոչման ծիրէն ներս, յաջորդաբար, Հ.Մ.Մ.-ի սկաուտական կազմը խորհրդանշական երթ մը կազմակերպեց Միութեան ակումբէն մինչեւ Անթիլիասի Մայրավանքը: Արդարեւ, Հ.Մ.Մ.-ի փողերախումբին առաջնորդութեամբ քայլարշաւին մասնակցեցան Ս.Դ.Հ.Կ. «Կուժունի» մասնաճիւղի վարչականները, Հ.Մ.Մ.-ի Կեդրոնական վարչութեան ատենապետ ընկեր Միսաք Նաճարեանն ու շրջանի Հ.Մ.Մ.-ականները:
Թէեւ երկրին մէջ սովորական աշխատանքային օրուայ մթնոլորտը տիրական էր, սակայն Անթիլիասի շրջանով մէկ Հ.Մ.Մ.-ի փողերախումբին համազարկերուն թնդիւնը պահ մը կ’ազդարարէր հայերու եւ այլ բախտակից ժողովուրդներու հանդէպ անպատիժ մնացած ցեղասպանութիւնները դրժող սուգի եւ յարգանքի պարտադրանքը:
Հ.Մ.Մ.-ական սկաուտ-արենուշներով ամբողջացած քայլարշաւին երկար գօտին Անթիլիասի մայրավանք մուտք գործելէ ետք, մասնակցեցաւ «Ապրիլ 24»-ի նուիրուած եկեղեցական միացեալ արարողութիւններուն:
