Սիրելի բարեպաշտ ժողովուրդ ի հայրենիս եւ ի սփիւռս,
Քրիստոսի Սուրբ Յարութեան ցնծագին աւետիսով եւ աստուածային շնորհների հայցով բերում ենք ամէնքիդ Հայրապետական Մեր սէրը, օրհնութիւնն ու բարեմաղթանքները։
Փրկչի Սուրբ Յարութեան տօնը հռչակումն է մահուան հանդէպ կեանքի յաղթանակի. յաղթանակ, որի համար Աստուածորդին Իր անձը զոհաբերեց, յաղթանակ, որը հաստատուեց որպէս մարդկութեան հանդէպ աստուածային սիրոյ լուսաշող վկայութիւն։ Մեր Տէրը հալածուեց, չարչարանքների ենթարկուեց, խաչուեց եւ մահը ճաշակեց։ Աստուածորդու անձնազոհութեան վշտագին իրողութեան յանդիման, ինչպէս վկայում են աւետարանիչները, Տիրոջ աշակերտներին ու հետեւորդներին համակեցին վհատութիւնն ու յուսահատութիւնը։
Մահուան թուացեալ յաղթութեան տագնապի մէջ, սակայն, մշտավառ յոյս, զօրութիւն ու ոգեշնչում դարձաւՔրիստոսի թափուր գերեզմանից հնչած Սուրբ Յարութեան հրեշտակաձայն աւետիսը. «չէ աստ, այլ յարեաւ» (Ղուկ. 24.6)։ Այս ցնծալի աւետիսը, արդարեւ, յաղթերգն է Քրիստոսի փրկչական առաքելութեան։
Մեր Տէրը՝ Յիսուս Քրիստոս, Իր հրաշափառ Յարութեամբ կեանքն ազատագրեց մահուան շղթաներից, փրկութեան լոյսը ծագեցրեց աշխարհում եւ Իրեն հաւատացողներին ժառանգորդ դարձրեց յաւիտենական կեանքի եւ երկնքի արքայութեան՝ ըստ Իր կենարար խոստման. «ով հաւատում է Ինձ, թէպէտ եւ մեռնի, կ’ապրի» (Յովհ. 11.25)։ Տիրոջ փրկչական առաքելութիւնը եղաւ չարի դէմ Բարու, խաւարի դէմ Լոյսի, մահուան դէմ Կեանքի պայքար, որ պսակուեց Յարութեան փառապանծ յաղթանակով։ «ո՞ւր է մա՛հ, քո յաղթանակը, ո՞ւր է գերեզմա՛ն, քո խայթոցը» (Ա Կորնթ. 15.55),- քաջալերուած բարձրաձայնում է առաքեալը։ Աստուածորդու Յարութեամբ աշխարհի առջեւ բացւում է յաւիտենութեան եւ փրկութեան ճանապարհը, եւ երկրաւոր իրականութիւնը սահմանաւորից ընդարձակւում է դէպի անսահմանը, դէպի երկնայինը։
Սիրելի բարեպաշտ հաւատաւոր զաւակներ, Քրիստոսի Սուրբ Յարութեամբ, յիրաւի, վերափոխւում է մարդկութեան պատմութիւնը, բացայայտւում է կեանքի իմաստը։ Յարութեան շնորհը փրկութիւն է պարգեւում բարի, արդար եւ հաւատաւոր կեանքի համար, Տիրոջ հետեւորդներին արժանացնում աստուածային առատ օրհնութիւնների ու բարիքների, ուրախակից դարձնում երկնայիններին եւ մասնակից՝ յաւերժական երանութեան անանց բերկրանքին։ Տիրոջ փրկարար կամքին հակառակ, չար ու մեղսալի ընթացքը, սակայն, դատապարտութիւն է եւ յաւիտենական պատիժ՝ անվերջանալի տանջանքների մէջ։
Այսօր, ցաւօք, ականատես ենք կործանարար դրսեւորումների աշխարհի տարբեր կողմերում, որտեղ մոլեգնում են անարդարութիւններ, ատելութիւն ու թշնամանք։ Պատերազմն ու աւերածութիւնները, մահն ու սովը ահասարսուռ արհաւիրքներ են սփռում, խեղում մարդկային կեանքեր, թշուառութեան մատնում բազմահազար ընտանիքների։ Քաղաքական, տնտեսական ու ռազմական հակամարտութիւնների յորձանուտում ոտնահարւում են ազգերի ու պետութիւնների իրաւունքներ, անտեսւում խղճի եւ բարոյականութեան արժէքներ, աւերւում հոգեւոր-մշակութային համամարդկային ժառանգութիւն։ Այս փոթորկայոյզ իրավիճակներում տառապող մարդկութիւնը տենչում է խաղաղութիւն, փափաքում աղէտների ու բռնութիւնների աւարտ, համերաշխութիւն ու երջանկութիւն։
Աշխարհաքաղաքական ներկայ տագնապալի զարգացումների պայմաններում ազգային ու հայրենական մեր կեանքը եւս գտնւում է լրջագոյն հիմնախնդիրների առջեւ։ Անվտանգային մարտահրաւէրների հետեւանքով ստեղծուած բարդ կացութիւնը առաւել ծանրանում է ներքին պառակտումներով ու ճգնաժամային նոր իրավիճակներով։ Մտահոգիչ են նաեւ մեր իրականութեան մէջ չդադարող մերժելի գործողութիւններն ու արշաւները՝ ընդդէմ ազգային եւ քրիստոնէական մեր ինքնութեան ու անցեալի։ Հաւաքական մեր յիշողութեան մէջ որպէս բաց վէրք է շարունակում մնալ քսաներորդ դարասկզբին՝ 110 տարի առաջ, Օսմանեան կայսրութիւնում իրագործուած Հայոց ցեղասպանութիւնը, որի չփարատուող ցաւը խորանում է այդ սոսկալի ոճրագործութիւնը կասկածի տակ դնելու կամ ժխտելու դատապարտելի փորձերով եւ աշխարհում տեղ գտնող նոր ցեղասպան գործողութիւններով։ Ոճրագործ այդ դրսեւորումներից էր վերջերս մեր ժողովրդի նկատմամբ իրականացուած եղեռնագործութիւնը՝ Արցախի բռնազավւթումը եւ արցախահայութեան բռնի տեղահանութիւնը հայրենի հողից։
Մենք, սիրելի ժողովուրդ հայոց, Տիրոջ Յարութեան շնորհի ժառանգորդներն ենք եւ այդ անխախտ հաւատով ի զօրու ենք մեր տառապանքներն ու կորուստները վերափոխելու ազգային վերածննդի՝ հաւատարիմ մնալով տէրունաւանդ պատգամներին, անսակարկ սէր ու նուիրում դրսեւորելով մեր ժողովրդի ու հայրենիքի հանդէպ։ Հայրապետական Մեր յորդորն է՝ ազգի շահը վեր դասել անձնական ու խմբային նկրտումներից, պարտադրուող հայրենավնաս քայլերից։ Մերժենք մեր կեանքից կեղծիքն ու սուտը, իսպառ հեռու վանենք ազգակործան բարքերն ու արարքները, մեր անցեալը, պատմական յիշողութիւնները նսեմացնող ու արժէզրկող, մեր ապագան վտանգող խօսքերն ու գործերը։ Համախմբուենք մեր հաւատքի, ինքնութեան, արժէքների, պատմութեան, մեր պետութեան եւ ապագայի համընդհանուր տեսլականի, այն ամէնի շուրջ, ինչը նուիրական է, ինչը միաւորում է մեզ ամէնքիս որպէս ազգ ի Հայաստան եւ ի սփիւռս։ Միաբանութիւնն է մեր ազգի հզօրացման եւ արժանապատիւ կեանքի վերականգնման ամուր եւ յուսալի հիմքը։ Արդ, լինենք միաբան ու միասնական՝ համախոհութեամբ եւ մեր ողջ ներուժի գործադրումով դիմագրաւելու մեզ պատուհասած փորձութիւնները։ Ողբերգութիւններն ու դժուարութիւնները կը դադարեն, եթէ ապրենք յաւիտենական կեանքի համար, ամէնուր Փրկչի օրինակով խաւարի մէջ լինենք լոյսի ջահակիրներ, լինենք մարտիկներ ընդդէմ անարդարութեան ու չարիքի։ Մեր ազգի ու հայրենիքի վերյառնումը նաեւ իրական դարձնենք նոր զաւակների ծնունդով եւ մատաղ սերնդի արժանաւոր կրթութեամբ ու դաստիարակութեամբ՝ ապահովելով հայութեան յարատեւ ընթացքը դէպի գալիքի յուսառատ հորիզոններ։ Մեր ժողովուրդը, որ Փրկչին ապաւինած աւերներ ու նախճիրներ է յաղթահարել, չի կարող այսօր յանձնուել ու տրուել մահին, այլ պիտի լինի կրողը յարութեան յոյսի ու շնորհի՝ աննկուն ոգով եւ անխախտ հաւատով միշտ ազդարարելով. «Քրիստոս յարեաւ ի մեռելոց»։
Քրիստոսի Յարութեան կենսապարգեւ այս աւետիսով Մեր ողջոյնն ենք բերում մեր Սուրբ Եկեղեցու Նուիրապետական Աթոռների գահակալներին՝ Ն.Ս.Օ.Տ.Տ. Արամ Ա. Մեծի Տանն Կիլիկիոյ կաթողիկոսին, Երուսաղէմի Հայոց պատրիարք ամենապատիվ Տ. Նուրհան արքեպիսկոպոս Մանուկեանին, Կոստանդնուպոլսի Հայոց պատրիարք ամենապատիվ Տ. Սահակ արքեպիսկոպոս Մաշալեանին, քոյր Եկեղեցիների Պետերին՝ մաղթելով գահակալութեան արդիւնաւոր, արեւշատ տարիներ։ Հայրապետական Մեր օրհնութիւնն ու բարեմաղթանքներն ենք յղում նաեւ մեր Սուրբ Եկեղեցու ողջ հոգեւոր դասին եւ համայն հաւատաւոր Մեր ժողովրդին։ Տիրոջ սէրը, օգնականութիւնն ու ողորմութիւնը թող պահապան լինեն ազգիս ու հայրենեաց:
Սուրբ Յարութեան այս լուսաշող առաւօտ, սիրելի բարեպաշտ ժողովուրդ, աղօթենք միասին առ Յարուցեալ Քրիստոս՝ աշխարհի, մեր ժողովրդի եւ հայրենիքի խաղաղութեան, ապահովութեան ու անվտանգութեան համար։ Մեր հայցն է, որ Յարութեան կենսանորոգ շնորհները վերափոխեն մարդկութեան կեանքը բարութեամբ, արդարութեամբ ու համերաշխութեամբ։ Թող աստուածային երկնառաք պարգեւներով գօտեպնդուի մեր ազգը, յաղթահարի առկայ բոլոր նեղութիւններն ու դժուարութիւնները եւ կերտի նորանոր նշանակալի ձեռքբերումներ՝ ի զօրացում եւ ի փառս մեր հայրենիքի եւ ի յաւէտ պայծառութիւն համայն հայութեան այսօր եւ միշտ եւ յաւիտեանս. ամէն։
Քրիստոս յարեաւ ի մեռելոց,
Օրհնեալ է Յարութիւնն Քրիստոսի:
