Միացեալ Նահանգներու նախագահ Տոնըլտ Թրամփի ձեռնարկած ու գործադրած մաքսավճարներու յաւելումի քաղաքականութիւնը սկսած է սրել Ուաշինկթընի յարաբերութիւնները շարք մը պետութիւններու դէմ՝ ներառեալ Չինաստանը: Ամերիկեան իշխանութիւններուն սահմանած մաքսավճարը 10 Ապրիլէն սկսեալ բարձրացած է 104 առ հարիւրի:
Չինաստանի ելեւմուտքի նախարարը իր կարգին յայտնեց, թէ 84 առ հարիւրի մաքսավճար պիտի սահմանուի ամերիկեան արտադրութիւններուն նկատմամբ, առ ի հակադարձութիւն չինական արտադրանքին նկատմամբ Ուաշինկթընի սահմանած մաքսավճարներուն: Ըստ Փեքինի կառավարութեան, մաքսավճարները 20 Ապրիլէն սկսեալ պիտի ըլլան 84 առ հարիւրի՝ նախապէս գործող 34-ին փոխարէն: Ամերիկեան Պաշտպանութեան նախարարութիւնը յայտարարեց, թէ Ուաշինկթըն պատերազմ չ’ուզեր, սակայն պիտի շարժի՝ կանխելու չինական վտանգը, իսկ Չինաստանի Արտաքին գործերու նախարարութեան համաձայն, Փեքին մինչեւ վերջ պիտի պայքարի, եթէ ամերիկացիները որոշեն առեւտրական պատերազմ շղթայազերծել Չինաստանի դէմ: Իսկ Չինաստանի Զբօսաշրջութեան նախարարութիւնը քաղաքացիներէն պահանջեց վտանգներու լոյսին տակ զերծ մնալ Միացեալ Նահանգներ այցելութենէն: Գանատայի ելեւմուտքի նախարարը իր կարգին յայտնեց, թէ 25 առ հարիւրի մաքսատուրք սահմանած են ամերիկեան որոշ ինքնաշարժներու նկատմամբ՝ առ ի հակադարձութիւն Օթաուայի նմանօրինակ քայլին:
Միացեալ Նահանգներու նախագահ Տոնըլտ Թրամփ յայտնեց, որ իր երկիրը այժմ պիտի սաւառնի աւելի բարձր, քան երբեք, շնորհիւ իր որդեգրած ելեւմտական ու առեւտրական նոր քայլերուն: Իր խօսքը ուղղելով արտերկրի մէջ գործող մեծ ընկերութիւններու սեփականատէրերուն, Թրամփ առաջարկեց աշխատանքները փոխադրել Միացեալ Նահանգներ՝ ձերբազատուելու համար մաքսավճարներէն եւ տուրքերէն:
60 երկրի նկատմամբ ամերիկեան մաքսային ու ելեւմտական վերջին որոշումներուն լոյսին տակ, Փարիզի սակարանը երէկ բացում կատարեց 2,78 առ հարիւրի նահանջով, Ֆրանքֆուրթի մէջ եւս գրանցուեցաւ նահանջ՝ 2,2 առ հարիւրի չափով, իսկ Լոնտոնի մէջ՝ 2,47 առ հարիւրի:
