Սոցիալ Դեմոկրատ Հնչակեան Կուսակցութեան Լիբանանի շրջանի Վարիչ մարմինը ներկայացնող պատուիրակութիւն մը, գլխաւորութեամբ ատենապետ ընկ. Վանիկ Տագէսեանի, Երեքշաբթի, 8 Ապրիլ 2025-ի երեկոյեան, այցելեց Մաարապ, ուր տեսակցեցաւ Լիբանանեան ուժեր կուսակցութեան նախագահ Սամիր Ժաաժայի հետ: Ժողովականները քննարկեցին Լիբանանին ու տարածաշրջանին վերաբերող նիւթերը՝ ներառեալ քաղաքական ու ապահովական զարգացումները: Յատուկ անդրադարձ եղաւ նաեւ Մայիսին կայանալիք քաղաքապետական եւ թաղապետական ընտրութիւններուն:
Տեսակցութեան աւարտին, ընկ. Տագէսեան լրագրողներուն յայտնեց, թէ Ժաաժայի հետ խորհրդակցութեամբ վերահաստատած են Հնչակեան եւ Լիբանանեան ուժեր կուսակցութիւններուն միջեւ համագործակցութեան կարեւորութիւնը՝ մանաւանդ Լիբանանի վերիվայրումներով լեցուն այս օրերուն: «Արծարծեցինք Լիբանանի քաղաքական վիճակը, ընդգծելով գերիշխան եւ ուժեղ պետութիւն ունենալու կարեւորութիւնը: Կը հաւատանք, որ գերիշխանութեան ձգտող քաղաքական ուժերուն միջեւ համագործակցութիւնը միակ միջոցն է վերականգնելու լիբանանցիներուն յոյսը եւ դիմագրաւելու մարտահրաւէրները», ըսաւ ընկ. Վանիկ Տագէսեան: Զրուցակիցները որոշեցին յառաջիկային շարունակել երկկողմանի հանդիպումները:
