Լիբանանի Կեդրոնական դրամատան նորանշանակ կառավարիչ Քարիմ Սուէյտ յայտնեց, թէ իրենք որպէս առաջնահերթութիւն կը մտադրեն աստիճանաբար վերադարձնել բոլոր աւանդները, խոստանալով միաժամանակ պայքարիլ ապօրինի տնտեսական գործունէութեանց դէմ: Անոր համաձայն, պետութիւնն ու դրամատուները պէտք է պատասխանատուութիւն կրեն, նախ վերադաձնեն փոքր աւանդները, ապա անցնին միջիններուն: Կեդրոնական դրամատան կառավարիչի պաշտօնի փոխանցումի արարողութեան ընթացքին Սուէյտ շեշտեց դրամներու լուացումի եւ ահաբեկչութեան ֆինանսաւորումի երեւոյթներուն դէմ պայքարելու որոշումը, աւելցնելով որ իր աշխատանքը պիտի ըլլայ լուռ եւ Կեդրոնական դրամատունը զերծ պիտի մնայ հարցազրոյցներ տալէ, բաւարարուելով գրաւոր յայտարարութիւններով միայն: Իր կարգին, դրամատան կառավարիչի նախկին պաշտօնակատար Ուասիմ Մանսուրի յայտնեց, թէ դրամատան մէջ արտարժոյթի պահեստը վերջին շրջանին աւելցած է երկու միլիառ տոլարով, հասնելով շուրջ 10 միլիառ 727 միլիոն տոլարի:
